日本喺今夏南非世界盃決賽周，攞唔攞到好成績我求大俠就唔清楚，但可以肯定佢哋個look會贏晒。
噚日日本足總表示，負責為球員設計世盃西裝嘅英國設計師，會幫參賽嘅23位球員打造成占士邦咁嘅look。日本足總發言人話：「呢套西裝真係幾型，仲要有埋袖口鈕。班球員喺出席比賽以外嘅場合，都會着呢套西裝，望落去真係同電影入面嘅007有啲似。」
一套要逾兩萬銀
我求大俠搵勻班日本球員，冇一個好似辛康納利、鐵摩達頓或者皮雅斯布士南咁型咁靚仔，但做得職業球員嘅，身形有番咁上下，所以佢哋應該carry得到套西裝。日本呢套占士邦西裝，全部度身訂做，埋單每套要成3千蚊美金（約2萬3千蚊港紙），以高級西裝嚟講，呢個價錢一啲都唔貴；但係23個球員加埋就要成6萬9千蚊美金，計落要成53萬蚊港紙，名副其實係「三軍未動，糧草先行」。