電影《歲月神偷》入面吳君如嘅金句就係「做人，總要信。」NBA魚腩網隊眾將亦將佢當做格言，周一竟然爆冷主場贏有真路比利因傷缺陣嘅馬刺，好難得咁贏咗今季第10場勝仗，肯定唔使做史上最差戰績球隊；而聯盟唯一同胞易建聯賽後仲好「思想正確」咁寫博客感謝祖國，呢份唱好祖國嘅情懷，真係搞到我求大俠哭笑不得！
博客肉麻感謝祖國
今季「中國巨龍」姚明腳傷全季報銷，7呎高嘅易建聯就成為中國球員嘅唯一亮點。之不過易建聯今季水準唔穩定，原因之一係佢受傷患影響，好似右肩受傷嘅佢今仗亦只係12投3中入8分；確實網隊呢場贏咗西岸強豪馬刺，佢真係唔算功臣，不過打正選嘅易建聯對勝利嘅執着，都好值得籃球迷學習同尊敬！
綽號「太空易」嘅易建聯贏咗之後喺博客寫咗一段話，我求大俠睇完真係感觸良多，「感謝祖國！感謝祖國！終於拿到這個賽季第10場勝利，我的微博粉絲也超過了50萬，哈哈！今天很爽！」佢喺博客入面好清晰咁感謝祖國兩次，但係遠在美國嘅網隊贏波，同偉大嘅祖國有咩關係？真係百思不解，唔通易建聯係唔想步溫哥華冬奧贏速滑1,500米金牌嘅周洋咁，喺創造佳績後唔識「多謝祖國」而備受抨擊？如果真係咁，易建聯真係用心良苦喇！
贏第10場算得乜
易建聯喺博客講埋晒啲肉麻嘢，佢隊友夏里斯就思路清晰話：「冇人想做史上最屎，所以贏咗第10場確實興奮，不過只係贏得第10場，你明我意思啩？事實上贏咗第10場唔代表雨過天晴！」現時錄得10勝64負嘅網隊真係聲名狼藉，早排球迷利斯更頭戴紙袋，以示對球隊不滿，同佢爭吵嘅網隊CEO約馬克就約咗佢周二食晏冰釋前嫌，不過利斯仍會以紙袋look出席，睇怕網隊鬧劇有排都未完！