復活節假期未開始，葉劉已經出門，帶匯賢智庫成員去美國矽谷考察，仲玩咗樣新奇發明，就係用腦電波揸車。
將來可服務病人
葉劉一行人前日去到聖荷西科技公司NeuroSky參觀，呢間公司開發腦電波應用產品，去年推出一款靠腦電波控制嘅電玩，玩家只需戴上有感應器耳筒，唔使用手掣，憑「念力」玩遊戲，似乎幾得意。葉劉參觀時獲安排試用腦電波控制模型車，架車冇軚盤，用個腦諗吓就可以控制架車行駛。葉劉深得阿爺器重，憑「念力」揸車，八方唔怕佢只靠左駛，最多一路向北，京官最驚嘅車毀人亡，都唔會發生。
呢啲腦電波產品當然唔係用嚟做電玩或模型車咁小兒科，目標係做輪椅、機械人操作，研發成功嘅話，只要諗吓就可以指揮輪椅或機械人做嘢，的確係病人福音。NeuroSky嘅CEO楊士玉（StanleyYang）14歲由台灣去美國留學，十幾年前創業做半導體公司，臨門一腳上市卻遇上科網股爆破，後來獲大公司出價收購，開會當日早上卻發生9.11事件，本來去雷曼兄弟世貿總部開會，點知雷曼冧咗，賣盤又唔成事，後來改投NeuroSky，有望守得雲開。