首富李超人投資項目多到數唔晒，當中包括好多人都玩嘅交友網站facebook，雖然持股量不足百分之一，不過投資額近10億港元，佢估計fb遲早上市。噚日業績會上有記者問佢有冇fb戶口，既然係老細之一，應該支持吓自己公司，點知超人話佢冇開個人fb戶口，事關佢事幹咁多，邊度會整個戶口同人分享私生活？「俾人點（擊）都點爆喇！」
最像真一個有五千朋友
雖然超人唔玩fb，不過佢話互聯網世界轉變得好快，自己都跟得好貼，學到幾多就幾多咁話。Bytheway，八方兩位同僚噚日係繼續冇獲業績會司儀小姐點名問問題，個司儀小姐應該檢討檢討，話唔定你個老闆其實有好多嘢想同蘋果記者分享呢！
李超人澄清無玩fb，不過八方上facebook隨便一click，已經發現fb最少有百幾個「李嘉誠」或「LiKaShing」，當中唔少係同名同姓，但亦都有啲似乎係渾水摸魚。八方唔知呢啲「李嘉誠」目的何在，既然家陣李嘉誠表明無fb戶口，假的真不了，為穩陣起見，add咗「李嘉誠」，而你又以為佢係真正李嘉誠嘅網民，應該認真考慮吓unfriend咗啲來歷不明「李嘉誠」。
其中一個最像真嘅「李嘉誠」，有近5,500個朋友，中英日美法意乜國家嘅人都有，好多人都視呢個「李嘉誠」係正貨，請教成功之道同做生意秘訣，最搞鬼係「李嘉誠」真係好認真咁回應，有人問應該幾時入市買股票，獲得回應係幾時都應該買；有個新加坡人話自己養妻活兒生活擔子重，想超人教佢發達之道，「李嘉誠」勸佢努力工作遲早有回報，好窩心o架。
反李嘉誠group僅十多人
喺眾多人膜拜呢個fb「李嘉誠」之際，亦都有網民提出究竟是真是假，呢個問題冇人答到，直至噚日真身澄清，終於打破呢個神話。fb都有個反李嘉誠group，加入者只有十幾廿人，無話10萬人厭惡一個政黨咁犀利。
mailto:[email protected]