AnnaSui御用插畫師　怪你過份美麗

若然騎呢古怪是罪過，可普通人生活悶爆可能更大罪。像土生土長的設計師LioBeardsley從小就走出一條古怪路，不愛小甜甜太可愛，反而充滿詭異色彩的黑白插畫更實在，結果一路走來，2004年參加DollyHeadMakeOver摘冠，搖身AnnaSui御用插畫師，「偏鋒」隨產品走入百姓家，這一着猶如獻唱《大開眼戒》：「若你喜歡怪人，其實我很美。」

記者：蔡俊業
攝影：梁細權、陳盛臣
部份圖片由受訪者提供

LioBeardsley
九十年代理大設計系畢業。04年參加AnnaSui的DollyHeadMakeOver比賽勇奪第一名而成品牌御用插畫師。她亦與Levi's、Extravaganza、SONY等品牌合作。

叫LioBeardsley省宣傳

LioBeardsley？明明是土生土長香港人，故意扮型嗎？
話說小妮子自幼便愛繪畫，畫呀畫，到大約10歲時，任職圖書館管理員的舅父有天突然送她一本書，「那是畫家AubreyBeardsley的畫冊。」翻着，她漸漸愛上這位來自十九世紀的英國畫家作品，原因竟然是「我發覺入面嘅畫有啲詭異，好華麗，好精緻。」再具體說明？「佢幫OscarWilde所畫嘅插畫，例如有張最出名嘅係講莎樂美托住佢最心愛嘅男人個頭，我覺得演繹得好好，有種神秘感，亦因為呢張圖，先吸引我睇埋個故事！」嘩，小時候唔睇小甜甜睇攞住人頭吊吊揈？「但我好鍾意喎！」鍾意到封他為偶像，更將自己的名字改為Beardsley。
但謎底只解開一半，Lio呢？原來跟聽歌有關。「那時DuranDuran有首歌叫《Rio》，係講一個好甜美好Charming嘅女仔，於是我就希望改個近音名。」行不改名坐不改姓，LioBeardsley沿用至今。但還是不禁問：想標奇立異博出位？「我鍾意講嘢，但我唔識得點樣去Promote自己！」

■獲AnnaSui邀請出席FashionShow，超羨慕呀！但唔係我！

■2004年參加DollyHeadMakeOver比賽擊敗全球參賽者。

■賽後有幸與AnnaSui（右）合照。

■08年跟丈夫Hei拉埋天窗，結婚照一樣詭奇。

愛一屋傳真機怪男

不懂得Promote自己，但Beardsley勝在韌力夠。從零開始，理大畢業後便任職設計師，可朝九晚五生活儼如OL，第一份工做了大半年，受不住而辭職。然後再做過幾間公司，6年前決定跟男友（現任丈夫Hei）自立門戶開Studio。
總結「失敗」原因，她說並不是工作辛苦，「我唔係一個好鍾意畀一啲嘢規範住嘅人，亦都唔鍾意同人講啲好生活嘅話題，例如佢哋會講劇集講湊仔，或者係去邊度食飯平啲，我就鍾意講音樂藝術。」然後她頓了頓，再說：「未必一定好音樂藝術嘅，一啲奇怪嘅人和事我都鍾意聽。」而記憶中，這些事情都發生在學生時代，「以前有個同學生活習慣好奇怪，每晚成四點鐘先瞓，成間屋都係擺滿Fax機電話同埋幾部電腦，我覺得呢類人好有趣。」

有AnnaSui行街Guide

香港人對越界舉動普遍不表認同，但Beardsley有理無理，繼續自我，2004年某天，她走過AnnaSui的櫃枱，見到他們正舉行公仔頭匠設計比賽，「我自己讀書時已經好鍾意呢個品牌，但最初都好猶豫，因為驚輸，但身邊有位舊同事鼓勵我話：『呢啲嘢係你鍾意嘅，你就應該去做！』咁就返轉頭攞表格！」她冀將二十年代FlapperEra的裝扮呈現評審眼前，「我好鍾意睇書，知道嗰個年代歐美社會女仔會剪Bob頭，又會戴條珠鏈同埋着直身長裙然後跳舞。」
Beardsley隨日子漸漸遺忘比賽的事，豈料有天收到電話，「以為自己入圍，點知話我中獎！」她突然升Key，「我話吓？中咗！」獎品是可以到紐約遊覽，誰知好戲還在後頭，「佢哋問我想唔想見Anna，梗係想啦，我就同阿HeiStayBehind玩成個月，睇吓有邊日可以見到Anna，最終都見到佢，佢仲問我留唔留低睇埋FashionShow，其實張機票已經Expired，就即刻打去話要Extend多幾日，後來更介紹幾個Museum叫我哋去參觀，又介紹咗幾本書畀我睇。」AnnaFans聽見實妒忌死！

處女個展　正視創作生態

談到創作，已成功衝出香港，作品備受日本及歐洲品牌賞識的LioBeardsley，有點為香港業界抱不平，「其實香港有好多Creative嘅人，見到《龍吟榜》或者外國講全球Artist嘅書，都有中國同香港作品，但點解我從來唔會喺市場上、喺港鐵或者喺Billboard見到？就係因為好多時受制於客人。」回想自己做打工仔時，便試過有客戶要求照抄別人作品，「好多客唔識Design唔識Art，又驚揹鑊，就會變得好保守，樣樣嘢都鍾意行中間路線，樣樣嘢都要黑色白色灰色，唔好踩界就唔會有人批評。」但創作，正正就是不能船尾驚鬼船頭驚賊，為了堅持自家路線，推生意有時在所難免，「家好啲，搵得我嘅都知我咩性格同Style，都有啲盲舂舂走嚟，但多數都合作唔到。」咁有性格，難得首次與商場合作，舉行個人作品展，平凡如你我，都可穿梭於這個不一樣的國度。