後日就係復活節假，一連5日，我安排咗10件靚女齊齊去南國小島度假，無乜特別吖，都係打吓沙灘排球，同陽光玩吓遊戲，幫靚女影吓寫真，同靚女荷官玩幾手21點Show吓Hand咁……成個行程，我預計使三、兩百蚊左右啦，Cheers！
文：阿洛
混熟囡囡影寫真
雖然係虛擬世界，但我都好忘形咁唱咗句：「噢ParaParadise！」，《DEADORALIVEParadise》呢隻Game，掛狗頭、賣狗肉，無任何欺騙成份，擺明車馬賣性感靚女。集合《DOA》入面班靚女格鬥家，佢哋除咗出名揪得外，仲出名係SexyBaby；今次隻遊戲就係同呢班靚女去南國島嶼度假，玩家可以同呢班着住性感比堅尼泳裝、外柔內更柔嘅格鬥美女玩沙灘排球、跳浮板等休閒遊戲，或者更可以去賭場玩21點、ShowHand、老虎機，贏咗錢就可以送禮畀班靚女，等大家關係親密啲。玩夠14日仲可以開啟「寫真樂園」模式，幫班靚女拍寫真，到時你送畀佢哋啲衫就大派用場喇，當中有超性感泳衣，仲有PE衫，超邪惡呀！
脹爆荷官參戰
一班平時好好打嘅靚女，包括女忍者霞、旗袍美女Leifang等9個角色，通通換晒泳衣變晒質，容許我稱佢哋為囡囡。TECMO都唔係第一次搵呢班囡囡同大家玩，之前都出過沙灘排球遊戲，球來球往令人好不興奮。今次除咗遊戲更多元化外，仲特別加入廠方喺2003年推出老虎機入面嘅女荷官角色Rio，好自然當佢開緊工時你就可以同佢賭兩手，放咗工又可以同佢打排球，玩熟咗咯，咪可以睇吓佢嘅私人生活檢唔檢點囉！
壽屋Crossover「霞」特別版
《DEADORALIVEParadise》咁多靚女當然唔會嘥料，同步會推出多個特典版，內含寫真集、角色配音、原聲配樂CD同「霞」彩繪包裝嘅「秘密樂園套裝」；仲有送特製嘅「霞」公仔特別版，由著名玩具廠「壽屋」製作，非常咁立體，睇見都開心。另外「預約特典」就多送張性感海報，隻Game今個星期五出街，想集齊一套唔該行快兩步，靚女同飛機一樣，都係唔等人o架！
Profile《DEADORALIVEParadise》
主機：PSP
類型：運動
人數：1人
製作廠商：TECMO
