TypeRClub十周年，創辦人James珠海吹雞搞TrackDay，老友車手、改裝商、輪胎代理齊撐場。十幾架戰神GT-R鬥圈速，睇到熱血沸騰。同場仲有中港台歐索模混戰，香港代表周秀娜火併人鬼索模，較量味一啲都唔輸蝕得過改到飛起嘅GT-R。
記者：徐影龍
攝影：梁細權
鳴謝：TRC
十幾架R35比圈速
TRC一連兩日喺珠海搞TrackDay，一班超跑車主同改裝車手，開開心心聚埋一齊玩餐飽。重頭戲之一係GT-RTimeAttack。論車款，今次都算幾雜，除林寶F430GT3呢類超跑，同場仲有蓮花Elise、Exige，當然唔少得Civic同掃把佬，連極少見嘅TVR都有，大部份經過喪改，架架都係爆住去，基本上喺香港好難見到佢哋咁勇猛嘅一面。
不過論人多勢眾都係GT-R贏晒，總數十幾架最新R35，起步點火爆炸再加引擎聲，震動整個珠海賽車場，企喺側邊影起步相，耳仔真係好受罪。戰神一批一批輪流出發鬥圈速，不斷刷新時間紀錄，每架都有知名改裝商Support，如AutoSelect、HKS、Enkei等，架架超過500匹，將本來幾近完美嘅GT-R搾出更多潛能。起步、入彎、收Brake等都相當完美有爆炸力，身處現場睇班戰神瘋狂疾飆，對車迷嚟講絕對係一種視覺同聽覺嘅享受。
索模埋牙如鬥車
另一場激戰，喺GT-R對決前就上演，索模Battle一樣咁有睇頭。首先大會兩位祖國RacingQueen，嚟自吉利及紅旗，論姿色有贏人條件，惜欠缺包裝，難敵幾位專為奧比斯籌款而現身嘅索模。港人女神周秀娜率先現身，稍為露兩手心口開個窿仔，幾秒間已引嚟四、五十人瘋狂圍影、果然甚有32D，應該係「3.2Diesel」嘅重量姐級風範。雖然娜姐甫現身即走人，不過一眾影友仍不愁寂寞，事關仲有兩大台模Charger留守，分別係近日攻港嘅Tia同Puff，身材高䠷態度合作，勁受港人歡迎。在後黃雀有德國AEZ輪圈派嚟嘅歐模Celina，高頭大馬周身有肉，極有外國大車風範。幾個索模輪流上陣，精采度不輸超跑落Track鬥車。可惜娜姐話啱啱考到車牌，DreamCar係日產GT-R，但又唔敢揸跑車。
