未到7.1，陳太又上街。除咗關心五區公投，陳太亦好關心弱勢社群，噚日下晝為一直關注癲癇症患者嘅非牟利機構「啟迪」做宣傳籌款，同一班關心呢種病嘅市民、義工，喺跑馬地球場跑道上行一公里，陳太話咁快行完。
陳太話「啟迪」辦事處只有八名職員，原因係想將行政費盡量減少，令到籌到嘅一分一毫，盡量能夠用在癲癇症病人身上，為佢哋提供多啲服務。陳太話唔少人都有誤解，以為癲癇症係神經病或傳染病，遇到有人發羊吊時唔識應付，手忙腳亂以為插隻匙羮入病人個口就冇事，其實咁做好危險，想認識多啲，可睇睇啟迪網站 http://www.enlightenhk.org