復活節機位爆晒，想訂之後出發嘅平價package，點知旅行社話冇機位。即刻同旅遊業議會主席胡兆英呻。
「唔好誤會呀。」胡主席解釋，經濟艙機位分唔同價錢級別，package位係平啲級別，因為航空公司電腦系統先進咗，家經濟位分得仔細咗：「唔只A、B、C級，真係26個英文字母都有齊。」變相package位少咗，就更加嗱嗱聲賣晒。
班機爆棚就一定冇計
不過，佢話航空公司會睇實機位銷情，發現貴嘅經濟位賣唔出，可能會降格做平機位，如package位「就會俾wait緊嘅客」，所以就算package位暫時冇位，都應該繼續等吓，如果唔係旺季，隨時執死雞。
仲有方法執死雞，佢話航空公司一般周五、六中午check機位銷售情況，大約周五、六深夜會掟啲賣唔出嘅位出嚟，呢啲時候上網訂票可能執到平嘢：「外國好興o架，鬼佬都趁呢個時候執死雞。」
又有業內人士話，如果喺大型航空公司訂唔到平價機位要等，不如試下訂埋其他航空公司，因為佢哋可以查到其他公司訂票情況，發現自己個客都訂咗對手嘅機位，會盡量撥個機位嚟搶客。不過以上方法都係非官方手法，得唔得要自己試吓，而且如果班機真係爆棚，就一定冇計。
電郵：mailto:[email protected]