長假期快到，難得股海似乎未受長假期效應影響，大市反覆向好，成交又增至628億元；有散戶吹水咁講，呢輪市場預期市況會靜，所謂十個牛皮九個淡，淡友偷步去沽，咁咪好易挾親囉！
大市雖企得穩，散戶炒股卻唔易搵食，尤其係跟板塊炒，好似昨日中芯國際（981）又爆升兼創52周新高見1.05元，同類股唔代表會跟炒，好似品質國際（243）只能平收0.52元，晶門科技（2878）仲要跌一格，報0.78元。
唔少股份業績雖不俗，但股價走勢唔跟，若股友一心炒業績，事與願違後又未肯止蝕，都幾頭痕。康師傅（322）去年純利3.83億美元，升47.2%；公佈業績後股價，由高位20.60元回落，跌至18.08元後雖略見反彈，但似受制10日線阻力，昨逆市跌1.3%，報18.70元，後市似再要試底。
內地方便麪市場競爭激烈，康師傅市佔率已近55%，以後再能進佔幾多？呢點對前景好關鍵，股價要落至16元水平才吸引。
方星俠