八方讀小學時上體育堂，多數係「放羊」咁喺操場hea，家陣啲小朋友幸福得多，PE堂竟然可以做瑜伽！仲要由黃佩霞、郭錦恩做導師，大家都知星級瑜伽導師收幾錢一堂，好彩佢哋係義務去大角嘴鮮魚行學校教小學生做瑜伽啫。
呢次瑜伽班係學校同BBC兒童頻道CBeebies合辦，校長梁紀昌指小學生學習壓力大，需要正常課餘及社交活動去減減壓，基層學生較少機會接觸瑜伽，希望呢次活動豐富佢哋嘅學習體驗。校長又指做瑜伽唔使好大地方同器材，家境麻麻嘅學生都可以喺屋企練習。黃佩霞話小朋友學習瑜伽有助平衡身體，提升柔軟度，對學習其他運動都有好處。