天文台前台長林超英退休後周圍去演講，噚日喺教院嘅校長研討會上，教校長點樣輕鬆駕馭事業。佢話要做到呢點，做人要智、仁、勇三全，冇智慧盞好心做壞事，不仁則害人害物，冇勇就一事無成。講到興起，佢忽然爆響口話：「前幾年有個人有勇冇智，好心做壞事。」雖然佢冇點名，不過全場頓時爆笑。
讚天文台有國際地位
八方之後問台長所指何人，佢即時好緊張，似乎擔心被秋後算賬，「我乜都冇講，講咗仲有命？或者係陳水扁呢！」既然林超英冇指名道姓，幾年前心口掛個勇字搞教改嘅李國章、羅范椒芬，就唔好對號入座嘞；搞出八萬五嘅老董，或者強推23條嘅詩姑、葉劉，都唔好咁多心。
林超英任內功過，唔輪到八方說三道四，佢噚日話其實香港天文台喺氣象界好有地位，係唯一獲《蘋果》讚嘅政府部門，國際上都好有名，連美國氣象專家都要嚟香港參觀取經，咁犀利，天文台唔止超英，仲趕美喎！