左派打壓補選公投，工聯會咬住唔放，王國興去信林D9，指既然港府唔承認公投，應該做多啲嘢，要求當局喺投票通知書上印上反公投字句，例如「任何形式的公投乃違憲行為」，即係好似煙包上有警告危害健康字眼咁。
王國興提出呢個建議，八方覺得十分之凶險，表面上佢反公投，實際上卻係曲線為公投做宣傳，須知道投票通知書幾百萬個選民人人有份，見到啲咁反智嘅所謂警告字眼，隨時引起反感，可能令更多人去投票。
各位愛國愛黨人士，對王國興呢個建議，千萬要小心呀。
社民連近日印製「五區公投是罵不倒的！」單張，輯錄人大政協批評公投言論，凸顯佢哋舔共嘴臉，加上狗噏指數，可惜冇加上王國興言論，否則其狗噏指數肯定爆燈。