為咗壯大愛國愛黨力量，民建聯好重視今年個暑期實習計劃，後日到中大招攬學生，呢個實習計劃冇人工，只有2,500蚊車馬費。民建聯送到上門，八方相信好多人有興趣，不過手空空無一物嘅中大學生，卻未必想往左走上保皇金光大道，中大學生會質疑校方公然協助政黨招兵買馬，實在太離譜。
青年民建聯已辦多屆暑假實習計劃，不限中大學生，18歲以上中、大學生都可參加，有幾十個名額。計劃標榜有「全港最大區議員網絡」、「龐大政策研究隊伍」、「立法會黨團全力支持」，吸引學生踏上「從政路」，可能怕反應太踴躍向隅者眾，反而冇提蛇宴同去北極睇企鵝呢啲最煞食活動。
學生會質疑校方是偏幫
中大學生會會長黎恩灝認為校方冇理由同政黨合作，「點可以幫政黨擴展勢力？」質問學生事務處就業策劃及發展中心是否偏幫個別政黨，其他政黨例如公民黨或社民連係咪都可以入中大搞講座招攬實習生呢？佢引述職員稱，要視乎個別活動議題而定。
正所謂小挺養妻活兒，大挺飛黃騰達，如果真係有學生想向左走跟民建聯，學似師兄陳克勤咁，其他人何必阻人搵食？只怕有人卧薪嘗膽捨身做無間道，仲隨時怪錯好人！話得說回來，民建聯向大學生招手，民主黨、公民黨何嘗唔係視大專院校為吸納新血橋頭堡？民主黨總幹事陳家偉透露已低調開始招收今年實習計劃學員，分別同城大、港大合作。
陳家偉稱如果學生係因課程要求而實習，民主黨不提供車馬費或薪津，否則就有時薪35蚊，另有跨區交通津貼，實習範圍包括到議辦工作，亦有機會去研究部學嘢。公民黨方面，平時已有請實習生，所以冇特別搞暑期實習；社民連都冇，因為平日要求做義工嘅學生已經好多；自由黨亦唔請實習生，就算請，廿蚊你做唔做？
mailto:[email protected]