【婚分之謎】備受婚變困擾的鄭中基和蔡卓妍（阿Sa），昨日各自投入工作療情傷。雖然鄭中基前晚在成都攞完香港區最佳男演員獎後，其主演的《越光寶盒》在內地票房又過億，但鄭中基昨日出席慶功活動時依然愁爆。對於阿Sa另結新歡傳聞，鄭中基昨日語氣肯定的說：「我唔相信阿Sa係咁嘅人。」
鄭中基與蔡卓妍上周五被本報獨家刊登了二人06年1月在美國洛杉磯的結婚證書後，隨即召開記者會含淚承認夫妻關係，並宣佈正在辦理離婚手續。雖然記者會當日，鄭中基聲稱與阿Sa分開與第三者無關，但本報接獲消息，指阿Sa去年在上海暗交年約30歲的富豪第二代，才令她與鄭中基的4年婚姻起了變化。
雙喜臨門唔識笑
面對婚變的鄭中基和阿Sa昨日各自收拾心情繼續開工，但二人臉上仍難掩傷痛之情。鄭中基前日先往成都出席ChannelV舉行的「第十四屆全球華語榜暨亞洲最具影響力大典」，並獲頒香港地區最佳電影男演員。至昨日，他又偕《越光寶盒》導演劉鎮偉及演員孫儷等，往北京出席《越光寶盒》票房過億媒體答謝會第一站，然後又趕往廣州出席第二站答謝活動。
雖然鄭中基主演的《越光寶盒》在內地上映10日已票房過億，而他前晚又獲頒香港區最佳電影男演員，雙喜臨門理應高高興興，但鄭中基昨日現身北京萬豪酒店舉行的答謝會時，不但眼腫腫，而且面容憔悴，毫無半點喜悅之情，僅偶爾強顏歡笑。縱使已塗上厚粉出現，但仍掩蓋不了他殘爆面容。
記者會原定2時半開始，但直至3時半才見鄭中基等人現身。司儀着現場記者可以問鄭中基一題有關電影的問題，但全場卻鴉雀無聲，無人理會，令鄭中基有點尷尬，劉鎮偉見狀遂打圓場問鄭中基：「你今年貴庚？」
鄭中基自離婚記者會後首度接受媒體訪問，記者問他現時心情如何，鄭中基避而不答，只說：「今日好開心，破咗我個人紀錄（指《越光寶盒》票房），今次最高。」傳聞有內地富豪第二代力追阿Sa，是否知道這件事？鄭中基說：「都已經交代咗，完全冇第三者，希望大家畀啲空間我哋。日日新鮮，唔知點答，唔想再有不實報道。我哋兩個人已經出嚟交代，唔想再有唔開心報道。」
聞內鬼唔知點答
對於阿Sa指有內鬼踢爆二人已婚一事，鄭中基表示不知情。有指爆料者不值阿Sa背着鄭中基結新歡才踢爆二人已婚，問鄭中基會否怪責爆料者？他想了5秒後才說：「會唔會？唔知點答。」對於阿Sa聲稱結婚一事只告訴一、兩個人知道，鄭中基說：「我唔知，我覺得呢個唔係一個issue，我哋出嚟交代咗，所有嘢已經交代晒，要講都講晒，再講一次冇第三者，我都唔相信阿Sa係咁嘅人，冇人理我哋工作，我同阿Sa都好困擾。」日後可介意跟阿Sa合作？鄭中基說：「唔介意。」當問到他與阿Sa愛的紋身如何處理、二人可有復合機會，以及會否挽留阿Sa，鄭中基即掉頭離開不作回答。
這邊廂鄭中基愁爆現身記者會，那邊廂的阿Sa下午4時半則到天后為即將舉行的Twins演唱會排舞，她也顯得悶悶不樂。記者追問她是否與內地富豪第二代拍拖時，阿Sa一臉嚴肅說：「冇啲咁嘅事。」會否為傳聞感到不開心？阿Sa說：「呢啲唔係事實。其實我都已經講咗。」究竟是否經常往內地相約富豪第二代見面？阿Sa說：「其實我一向都唔識，根本唔係一個事實。我可以用時間嚟證明。」阿Sa在排舞室逗留至晚上7時許便離開返回跑馬地新竇。
採訪、攝影：曾小嘉、陶然婷（北京）、張俊銘（香港）
長約縛住阿Sa
阿Sa決心告別鄭師奶之名，有傳她跟英皇的賓主關係到2012年結束，合約更訂明不可結婚。經理人霍汶希（Mani）昨日否認說：「未係，唔止到呢個時間，仲未滿約。」會否趁現在阿Sa再度單身即與她傾續約並列明不准結婚？Mani表示：「唔會，到時先傾，唔會唔准結婚。」
不過，阿Sa近年單飛發展，已成為公司最賺錢的藝人之一，叫價力大增。經常大呻工作辛苦兼冇假放的阿Sa，這次在即將開Twins復合演唱會期間爆出離婚事件，更令她心力交瘁，因此早前她已申請演唱會後放假，相信合約完結後她會否跟英皇再續約也成疑問。
採訪：比華利