馮仁昭四圍超：有線10世界妹晒冷　C朗、卡卡變性 - 馮仁昭

四年一度嘅世界盃好快喺6月開鑼，最終俾有線電視經公開競投取得播映權，當中有幾場重要決賽，無綫同亞視想用番自己製作嘅片段播出，搞到兩家免費電視台難得槍口一致對外要爭取分一杯羮，三方直到家都仲未傾掂數。雖然係咁，有線有理冇理着手宣傳世界盃，最近佢哋搵咗10個女仔擔任「有線WorldCupAngel」，不過係咪大家心目中嘅天使模樣，就真係見仁見智嘞！

足球先生上身

日前10位天使齊集影第一輯宣傳相，佢哋齊齊着起露臍裝同泡泡裙青春十足，除咗影相之外，所有靚女都要惡補世界盃資料同足球常識，唔係點宣傳世界盃喎！唔單止咁，10位天使各自擁有一名世界足球先生嘅名嚟做代號，好似卡卡、C朗同美斯咁，各位球迷叫起上嚟都夠晒親切感。
有線呢10位天使，年紀只係18歲到廿幾歲，的確夠晒青春，但係就冇乜邊個有突出嘅樣貌同深不可測嘅「事業線」，其中18歲嘅「小豬」嘅文紫玲，原來佢之前參加過《美少女廚神》與亞視《財神到》，唔怪得個樣有啲熟口熟面啦。