4月2至6日對大人細路哥來說都是大喜日子，一連五日紅假，老竇媽咪放假超悠閒，正日星期天實行合家歡豪一次來個自助午餐，嘆即開生蠔、即切西班牙風乾火腿、炭燒牛羊雞，再同囝囝囡囡畫公仔做手工玩攤位，既可親子交流又可享受一流美食，附送無敵維港大海景，一樂也！
記者：梁美
攝影：梁細權
Models：Cherry、Suki、Paris@PureModels
即刨即切火腿香
位於IFC內的Hone走時尚品味路線，食材用料之高大家心裏有數，復活節期間加多點溫馨，於4月2日至6日中午12時至下午3時推出親子自助餐，成人及小童每位分別是$388及$188，前菜、冷熱盤、沙律吧、意粉吧、甜品專櫃等等，即切西班牙火腿、即刨意大利火腿、即開五款來自美國、法國及澳洲新鮮生蠔、即煮意大利粉、即煮酸辣開胃冬蔭功湯等，必試冷盤中即開生蠔及海鮮類，生蠔鮮味肥美而阿拉斯加蟹腳肉甜汁豐。主菜每日均可從牛、羊、雞、魚、蝦、素六款中任擇其一，以餐廳自設的炭爐，加入日本備長炭烤製而成，推介炭燒法國雞胸配雜菜及意大利白蘆笋配意大利煎蛋。法國雞胸肉質不算太滑，但肉質結實有嚼勁，雞味濃郁汁又豐，炭燒後更帶點點炭香，搭配先灼再以汁撈成的雜菜，味道複雜有層次。
素主菜的意大利白蘆笋配意大利煎蛋，以當造鮮甜無渣白蘆笋配香煎意大利太陽蛋，蛋黃大而甘香，配爽甜蘆笋，出奇地搭，就連蛋白也滑不溜口，不知不覺間KO了這份簡簡單單食味奇豐的主菜。
270°海景遊樂場
既然打正旗號為親子自助餐，餐廳利用位於旁邊同集團的另一間餐廳TheBox，於中午12時30分至2時30分，打造出別出心裁的兒童王國，五個攤位遊戲及三個手工藝坊合併成遊樂場，找來專人教大朋友及小朋友做出七彩繽紛復活蛋雕刻、卡通匙扣、水晶蠟燭、臉手畫花等。自問稍欠藝術天份的，就跑去玩雷射激光射擊、小型波波池尋蛋，又或者打個開心高爾夫球等，乾淨利落又開心，最盞是TheBox擁有270°維港景色，日間都可以飽覽對岸文化中心、太空館、天星碼頭等建築，和囝囝囡囡上多堂通識課也不錯！想吃自助晚餐欣賞夜景？得，成人及小童每位分別盛惠$488及$288，食物款式更多更精緻，但，無兒童王國無攤位及手工藝玩了！
炭燒法國雞胸配雜菜
每日提供六款主菜供選擇，法國雞胸肉質結實具嚼勁，雞味濃汁又豐，上桌即送來陣陣炭香，香味撲鼻。
Hone（28050638）
中環金融街8號國際金融中心商場4樓4008號舖
即製罕有甜品
君悅酒店「茶園」的甜品及下午茶自助餐素來捧場客不斷，即日起至4月11日更配合復活節推出多款朱古力甜品及現場即製法式薄餅，自助下午茶由下午3時30分至5時30分，成人及小童收費分別是$218及$109。自助餐供應熱食小吃達4、50款，除招牌英式鬆餅、格仔餅等之外，加設復活主題甜品桌，供應久違了的千層薄餅蛋糕、巧手薄餅等，更有甜品師傅利用黑、白、牛奶味三款朱加力炮製出大小朱古力賓尼兔仔，再加入心思餡料，炮製出七彩朱古力復活蛋，滿佈整張甜品桌，見到已經很開心，對一隻隻可愛朱古力兔仔，更是捨不得放入口呢！
轉攻即製法式薄餅，包括法式香橙酒薄餅、芒果呍呢拿薄餅、德國薄餅配提子冧酒及合桃等。必試德國薄餅配提子冧酒及合桃，這款原是奧地利傳統甜品，坊間少見，事關製法複雜及火候溫度難掌握，師傅以德國蛋、奶、粉等調製成粉漿，下漿後煎至底面成香脆金黃色而內裏濕潤，保留蛋香粉香之餘，配香濃冧酒提子及嚼勁十足的合桃，口感豐富，至啱大朋友。小朋友更可以於桌上的樽樽杯杯找糖果蛋蛋，師傅特意將朱古力復活蛋做得細細隻方便小手拿取，甜品桌上更供應多款專程從瑞士訂來的黃梅杏仁糖、維也納金杏仁糖、Tiramisu杏仁糖、法國純朱古力薄脆等，單是這張甜品桌，已大受小朋友歡迎！自助晚餐也有復活節甜品供應，成人及小童收費分別是$538及$269，想將精緻朱古力帶回家亦得，可於酒店大堂左邊的Chocolatier找到。
法式香橙酒薄餅
坊間一客叫價一百幾十，這裏用的是五星靚料，吃兩三件已回本！
德國薄餅配提子冧酒及合桃
一道奧地利傳統甜品，既能將兩面外皮煎到香脆金黃，又可保持內裏濕潤綿香，抵讚！
茶園（25847722）
灣仔港灣道一號香港君悅酒店M樓
