喺Now嘅無綫收費電視「精選台」，追韓劇《妻子的誘惑》追到氣咳，成130集，節奏慢到播咗幾十集妻子都未有誘惑。啱啱追完又播《天使的誘惑》，但睇睇吓一肚氣。因Now通知，4月1日起睇「精選台」每月畀多$18。好多姊妹巴打喺網上狂抦。
網民揚言杯葛
係咁嘅，Now嘅「無綫收費電視」有10幾個頻道，但Now規定要一次過買晒所有頻道，package正價$138。小妹舊年尾申請Now時，「無綫」仲有「英皇娛樂台」，但無端端cut咗，再加呢個精選台。點知cut台唔減價，加台就另加$18！如果佢cut多啲舊台，再逐個新台加錢，咪好發？而且當初sale講明，package價係睇晒無綫所有頻道，似乎講咗唔算數！
揀播熱門劇集嘅精選台另收錢，唔知係咪睇死劇迷走唔甩，但網友喺討論區（包括無綫討論區）聲言杯葛，有人仲話精選台要免費代替《志雲飯局》。
Now回應，精選台唔係替代英皇娛樂台，而且11月30日啟播後，只係畀客戶優先試睇，優惠過後正式收費。Now可以代客戶向無綫反映意見。
無綫就話，精選台推出時畫面有顯示只係優先試睇，但可能訊息唔夠清晰，又話如果係直接向無綫收費台申請嘅客戶可以延長合約代替收錢，但Now客戶就由Now決定。咁講即係雙重標準喇？而且士可殺不可辱，最多買劇集DVD嚟追。（唔好上網BT下載呀，咁係侵權行為嚟。）奉勸各位，以後上台訂頻道要問清楚使唔使再另收費至好做決定。
大家如果都有咁嘅問題，可以打去熱線1000，叫Now向無綫反映，睇吓可唔可以有乜安排。
電郵：mailto:[email protected]