「Sa基戀」劇情峯迴路轉，當事人鄭中基（Ronald）和蔡卓妍昨日分道揚鑣分別在北京和香港工作，兩人再被追問離婚是非已採封嘴態度，不過依然令眾藝人議論紛紛。
雷頌德：喺呢啲情況下最好唔好搵Ronald啦，我有啲咁嘅事都唔想人哋搵我囉。至於有傳阿Sa有第三者，都係傳嘅啫，人哋之前都交代晒，就信吓人哋講嘅嘢啦。
鍾嘉欣：畀啲空間佢哋啦，我唔知我結婚會點，可能嗰時唔喺呢行，咪唔使講囉。每個人都有苦衷，我又未有結婚打算。我初入行時覺得拍拖講就講囉，家覺得有同冇都唔使交代，唔影響工作就OK。
鄭融：佢兩個感情好真摯，我會祝福佢哋。不過呢件事對我嚟講只係一單新聞，冇乜特別感覺。
鍾舒漫：我未見到阿Sa，呢啲始終係佢哋兩個人嘅事。我同阿Sa係同事同朋友，希望大家畀多啲空間佢。
洪卓立：我冇打電話畀佢，只係發咗短訊畀阿Sa。我唔認同藝人嘅事係大家公眾嘅事，結婚係兩個人嘅事，大家冇需要咁激動。希望大家尊重佢哋決定，若果他日我結婚都會同公司商量，我本身冇乜所謂公開與否。
胡杏兒：公唔公開係佢哋嘅選擇，佢哋有權唔想講，冇話啱唔啱嘅。結婚係開心事，畀我就唔想辛苦收埋，但會體諒佢哋。
