同一個政府，同一個行業，同一個月份，唔同字頭竟然會有截然不同嘅睇法！中國國務院旗下國有資產委員會綜合局局長劉南昌，前幾日響「2010年經濟形勢與電力發展分析預測會」度講，二月份全個電力行業都蝕錢，電企資產負債比率普遍都高過80%，佢仲語重心長咁提醒大家，電力企業已經進入風險攀升嘅階段！講到個情況好似嚴峻過雲南旱災，咁係咪無貨就唔好買，有貨快啲散先？
統計局讚好 國資委話蝕
且慢！有電力股喺手嘅股民又唔使咁擔心喎，大家不妨睇睇國家統計局又點講！佢哋響官方網頁度公佈，1至2月份電力行業利潤繼續快速增長，實現利潤156億人仔（人民幣是也），比之前一年增加咗132億，增幅有成5.5倍（舊年同期係下降61.9億人仔），表現之好絕對唔講得笑！睇完統計局呢粒數，唔入齊4隻喺香港掛牌嘅電力股，至少都入一隻半隻喇！
咁……我哋應該相信國資委抑或統計局先啱呢？究竟電力企業蝕到嘔定係賺到開巷先？股民家應該買電力股定係沽貨好？華華真係唔知，我相信連溫總都未必答到你！
大家惟有等下個月啲電企派成績表，到時咪知邊個「抄錯錶」囉！
建行俾人話抽水 郭樹清嫌不光彩
內地電力行業究竟係賺係蝕家未知，但銀行業就肯定威威，工行（1398）係亞洲最賺錢公司，建行（939）舊年利潤都首次過千億人仔，照計董事長郭樹清（圖）應該好開心，點知佢竟然嗱埋口面。點解？咪就係俾人話「抽水」囉！唔好誤會，唔係郭生抽人水，而係建行喺市場集資嗰隻抽水呀！
郭樹清噚日喺香港主持記者會，劈頭已經澄清，話建行冇喺市場抽水400億人仔，「我理解抽水有負面意思」，又強調佢哋間寶號唔缺水，俾人話佢哋要抽水，「不是太光彩」。
郭董越講越收唔到口，話建行05年喺港上市，係首間H股全流通內銀股，一直都幾受投資者歡迎，前景一片光明，家陣媒體「抽水」嘅負面報道，講到建行好似洪水猛獸咁。查實郭董唔使咁勞氣，事關「抽水」兩個字喺媒體嘅財經新聞出現，只係活潑坊間口頭語，股民一睇就明，媒體對間間內銀股，用語都係一視同仁嘅。
榮太子離開中信 阿仔留低狂加薪
建行郭樹清唔鍾意人哋用「抽水」嚟形容佢哋嘅融資大計，覺得用字唔多光彩，咁華華相信，當日中信泰富（267）炒燶澳元，太子榮智健應該更加唔想多提。為咗呢件「唔光彩」嘅事，舊年4月太子毅然辭職唔撈，剩番佢個寶貝仔明杰（圖），喺中信泰富繼續做執董。表面睇，太子好似付出咗好大代價，但作為平民嘅我同你，千祈唔好以為佢好慘！事關榮太子喺中信泰富公佈業績後嘅股價高位，掟貨套現8億銀。
仲有，根據中信09年年報顯示，太子雖然4月唔撈，但都有百幾萬袍金執番，而太子仔明杰嘅人工，更加由08年嘅186萬，大幅「調整」到1252.5萬銀，升幅足足近6倍！相對又遊行又輸得眼甘甘嘅小股民，係咪好大對比呢？
李華華
mailto:[email protected]
