iPad就快上市，立即有唔少電子書湧現，要趕上呢股ebook熱，今個星期漢王就在香港推出兩款港版電子書N518及N526，除咗睇到大部份常用文檔，更有手寫功能，當睇到有咩生字唔識，一篤即查字典，今時今日，睇書仲使攬住部字典咩？
記者：許福合
攝影：楊錦文
Model：Norain@PureModels
手寫電磁屏
呢兩部N518及N526雖然顏色一白一黑，不過其實只係好細微分別，而最大賣點，都係有個手寫電磁屏。須知現時大部份自稱ebook嘅產品，都使用e-ink屏幕，貪佢有接近紙張嘅視覺效果，睇得舒服！而漢王N518及N526使用手寫電磁屏技術，讓用家可直接以手寫輸入方式操作。
可能有人會話Touch芒有咩咁特別？同一般輕觸屏幕不同處，係手寫電磁屏由底板及電磁筆組成，e-ink屏幕在前，手寫電磁屏在後，既保持咗光度，在書寫時嘅質感亦相當好，缺點係只能透過Stylus筆書寫及操作，但可防止誤按嘅問題，最重要係呢個設計更慳電，叉一次就可用15日。
手寫試玩
五大詞典
N518及N526可以睇到大部份常用圖文格式，PDF、HTML、DOC、JPG及TIFF都無問題，出機之時，就會預載5,000本繁、簡及英語書籍，試睇過同外國名氣響亮嘅Kindle真係分別不大；而用佢睇書最方便之處，係遇到有生字唔識，只要用Stylus筆在字詞上一畫，即時會跳出字典視窗，會有英譯中或中譯英嘅「簡單字詞對照」，更方便係唔只單字，有時直接畫上數個字都無問題，部份字詞更有埋發音功能，點選小喇叭圖示即可聽到讀音。
此外，機身另內置有詳細字典功能，只要用Stylus或鍵盤輸入中或英文，就可查詢解釋，並且可從《朗文當代》、《大英百科》、《英漢詞典》、《新華詞典》及《古漢語詞典》選擇，可得到唔同類型解釋。另一個便箋記事就更好用，當成紙張一樣使用，記事寫Notes都好方便。
查詢：漢王（21527789）