九龍塘瑪利諾書院校方上個月喺反對聲中堅持斬咗70年歷史嘅鬼樹，令到好多舊生好失望。一班曾經出力爭取保留鬼樹嘅舊生，噚日就幫鬼樹搞咗個小型追悼會，大約30人首先為鬼樹默哀一分鐘，之後又播咗一段由舊生製作嘅鬼樹生平短片。
發展局曾承諾撥款
雖然鬼樹已經離世個幾月，但校方由決定到最終斬樹嘅過程，仲有好多謎團未解開，當中亦涉及發展局等政府部門。噚日班舊生提起斬樹依然咬牙切齒，話一定會追究到底，還鬼樹一個公道。佢哋話已經向申訴專員公署投訴，要求徹查事件中有冇政府部門疏忽，公署現階段搜集緊資料。舊生亦會追究早前發展局承諾撥款50萬元保育鬼樹，到底今時今日呢筆錢使咗去邊？點講都係公帑，冇理由唔交代清楚啫。
鬼樹離開但仍然遺愛人間，部份舊生經歷過今次事件，體會到本地保育樹木工作不足，主動籌組咗一個叫「百年樹木」嘅非牟利組織，仲邀請幾位專家參與，目的係保育香港嘅樹木，同埋防止日後再有樹木被無理砍伐。