公民黨陳淑莊Tanya一向係好戲之人，之前喺《東宮西宮》充份發揮演戲細胞，可惜從政之後冇乜時間粉墨登場，最近辭咗職先有機會重投演藝事業，事關佢最近為宣傳五區公投運動，拍咗輯宣傳短片《我有一個夢》，故事喺有40年歷史嘅中環結志街海運茶餐廳發生，茶餐廳太子爺Vincent更親自上陣，向茶客Tanya控訴政府只顧發展忽略社區人情味。
片中欠政府25萬元貸款嘅大學生、因業主瘋狂加租而結業嘅小商人以及受強拍條例影響嘅小業主等，都會喺茶餐廳盡訴心聲。
套片想帶出嘅訊息好清楚：一切唔公義都係因為政制唔完善所致，講到尾自然係呼籲選民5.16一定要投票。