導演張藝謀擔任總執導嘅歌舞劇《杜蘭朵公主》前晚喺台灣公演，不過美中不足嘅係演出場地接駁車唔夠，結果搞到演出要順延約20分鐘先開始，加上場內嘅廁所又供不應求，令女廁大排長龍，有啲嚟唔切入場嘅觀眾只可以企喺好遠欣賞演出咋。
首重保護環境
演出完後第二日張藝謀又馬不停蹄去日月潭，同場仲有郭台銘同南投縣長做伴，講到對《印象．日月潭》計劃，張藝謀話：「日月潭已經很美，也許任何的演出是多餘的。」當然佢哋都會考慮演出嘅可能性，不過點樣都以保護環境擺喺第一。
至於郭台銘喺2007年曾斥資約31億台幣喺大陸山西打造嘅影城，當日就係搵咗張藝謀同行，今次到張藝謀嚟到台灣，郭台銘梗係一盡地主之誼，以主人家身份相約一聚啦，相信佢哋會趁有機會，傾吓有乜嘢可以搞啦！問到張藝謀同郭台銘有乜合作大計，佢只係話：「來日方長。」郭台銘則答：「就當我不在這裏。真的不能奉告。」
