期指結算臨近，上禮拜好淡雙方繼續埋身肉搏，淡友成功突襲，好友力守50日線，禮拜五施回馬槍，追番274點，今日係結算前夕，好友有機再下一城。
上周五花旗股市又係反覆微升，道指蠢蠢欲動想破11000關，睇嚟正凝聚動力。東涌有地皮勾出，地產股會唔會借勢發難，值得留意。
平保C輪21432：平保（2318）上日報收64.55元，升1.1%。股價短線有機上破位處66.40元嘅100日線，上望72元，可以諗吓隻C輪21432。
隻輪現價74仙，2010年9月27日到期，行使價64元，溢價10.6%，引伸波幅39.7%，有效槓桿4.9倍，正股升上72元，21432有機會見1.22元，正股跌穿61.80元，就沽咗隻輪止蝕。
俊樺