啋，醜嘅唔靈好嘅靈。舊年金融海嘯，煲呔政府宣佈用1億成立個盛事基金嚟冲喜吓，話要資助民間搞吓啲文化、藝術或體育盛事。近日喺梅窩舉行嘅「水燈及天燈節」，基金亦有科水，鬍鬚曾前晚仲入到去大嶼山主持開幕禮，點知噚晚大會放個41呎高嘅天燈、試圖破世界紀錄時，個天燈竟然喺放放吓上演自焚，眾目睽睽下燒毀，破唔到世界紀錄不特止，仲真係大吉利是。
政府掂親啲嘢都出事
天燈節喺洪聖誕舉行，放天燈又係為咗祈福，個天燈放唔到兼燒鬼埋，梗係唔老利。玄學家麥玲玲話，雖然盞天燈燒咗唔係乜嘢大凶之兆，但舉凡祈福呢啲嘢，都講求意頭，若然有乜阻滯意外，就唔係咁好意頭，大家梗係都唔鍾意，所以大會應該準備得好啲。
老實講，自從回歸寶鼎斷腳準備預示老董腳痛下台，車公靈籤又一再顯靈批中香港時局，八方都好明白大家點解咁棹忌。八方形住，今次天燈自焚亦有玄機，寓意政府掂親啲嘢都會搞禍。唔係咩？明明民間自發已經搞起咗好多盛事，七人欖球賽、渣打馬拉松甚至赤柱龍舟賽都係最好例子；好嘞，到你政府又話要搞啲乜嘢盛事出嚟，就硬係變成問題多多，混混亂亂。
潮漲搖櫓賽提早決賽
好似今次咁，礙於安全問題同消防條例所限，市民放嘅天燈要用條繩綁住，即係好似放風箏咁，而且每次只可放四盞，但八方聽聞，連日來仍然有啲甩繩天燈隨處飄。放水燈又係，大會原本安排市民去條河度放，但唔少人費事等，走去附近海邊放。
天燈節前日又有個國際搖櫓比賽，但因為潮漲問題，遲咗開始又提早決賽，搞到好多市民睇唔到；天文台有晒潮汐時間預報，八方唔明點解咁都冇查清楚。
mailto:[email protected]