以少爺占為首嘅樂隊野仔，逐步由地下走向地上，雖然近年先開始慢慢為大眾熟悉，但其實唔經唔覺佢哋已經成立咗8年。今日拉大隊講車經，就揀咗阿占至愛嘅寶馬，佢哋將架豪華GT玩到反轉，好彩GT配備多多之餘，門都夠多，唔係都好難滿足到呢幾個百厭星。
記者：許維雅
攝影：梁細權
忠心Fans
六人組合野仔今日只派四子出場講車經。小胡同Wilson間中都會揸老竇嘅車代步，而阿銘就有架電單車，最後到佢哋口中最有米嘅阿占，就揸架寶馬旅行車到場做訪問。小胡首先印證「阿占有米」之說：「野仔眨吓眼就8年喇，呢8年嚟最深刻就係睇住阿占細車換大車！」樂隊事無大小一向以阿占為首，訪問揀寶馬影相亦十分理所當然，因為好多人都知阿占係寶馬迷，阿占愛寶馬大條道理：「價錢相若嘅歐洲品牌，寶馬畀我嘅感覺young啲。其實之前換車都有諗過試吓日本車，但發覺揸慣歐洲車，真係好難返轉頭。內櫳皮質都唔同，軚感實好多，一撞就知鋼水好。簡單啲講，真係開門嗰下就K.O.你。」阿占忠於音樂同對品牌嘅堅持一樣，最近換新車都係揀番寶馬。「其實我唔多鍾意揸車，對車款亦唔太講究，不過部旅行車揸咗四年喇，再唔放就唔多值錢，所以一定要換新車。我啱啱訂咗部白色X1，7月先有得攞車，比起家部旅行車高身少少，但就係四驅款。」
汽車夾Band都奢侈
其餘三子雖然自謙仲未有能力買寶馬，但買唔起都一樣玩得投入，對住部535iGT玩到不亦樂乎，車門會自動閂都笑一餐，更加不停左摷右摷試勻各種按鈕，然後齊齊大叫呢架車太豪華！阿占：「GT豪到有啲似老闆車，要搵司機揸。」Wilson：「我覺得夠型，最好自己揸。」小胡：「似任達華、梁家輝用嚟接小朋友放學。」爭論不休，其實車都係各花入各眼啫，不過GT車頭偏向方正硬朗嘅造型加上蜂巢狀指揮燈嘅設計，就最得阿占歡心。阿占一向對馬力、引擎唔多熟，最叻只會問：「呢部車要入幾錢油？」咁佢一定唔識欣賞GT嘅直六加TwinTurbo引擎，實在有啲可惜，不過油耗每一百公里只需8.9公升嘅表現，就應該好啱佢呢個慳家仔嘅心水。每個人對車都有唔同定義，野仔嘅睇法都算一致，認為車似係藝術品，阿銘更指：「唔覺得喺香港車係用嚟代步。」呢一刻佢哋只係一心想做好音樂，因為要夾Band成功同買車一樣，都係奢侈品。
BMW535iGranTurismo
引擎：2,979cc直六+TwinTurbo
馬力：306hp/5,800rpm
扭力：400Nm/1,200-5,000rpm
傳動：8速+/-半自動波
售價：$728,000
查詢：27145271（BMWHK）
