大圍名城開售，初步定價係8690元一平方呎，樓神趙國雄話平均價會高過一萬元一呎，厲害厲害，九七年高峯期嘅駿景園亦係呢個價錢，到家仲未返家鄉，已見新樓盤勇闖高峯。香港有錢人多，一位陳先生據說住於太古城，買「天匯」一個單位，九千幾萬元，一次過現金支付，巴閉喇啩，既然咁有錢，點解會住在太古城一個七百幾呎單位？想來一定係風水樓之故，否則冇乜好解釋。
呢日在港麗酒店咖啡園吃中午自助餐，生意好到極，大堂會廳人頭湧湧，泰文、英文、普通話、法文盡皆入耳，究竟係乜嘢一回事，睇真啲，好多人心口掛住CreditSuisse個牌，一定係七人欖球賽前幾日之瑞信世界投資研討會啦。七人欖球賽帶旺香港酒店，外來遊客蜂擁而至，瑞信係贊助商，每年在球賽之前召開投資論壇，聽完股經就講欖球經，號召力無與倫比，贊助費雖然好高，瑞信應該覺得物有所值。請左丁山吃飯之法國老闆唔係瑞信客戶，在港麗吃午餐，與瑞信撞到正，純屬巧合，佢就話好鍾意香港呢股國際氣氛，動感都市，在香港辦事，行路都行快幾步，鬥志昂揚。左丁山問：「你哋法國人唔係鍾意嘆世界，講文化嘅咩，做乜要學香港人行路咁快？」
法國老總B反問：「你上一次去巴黎，係邊一年？」左丁山話：「我係鄉下仔，甚少到歐洲，上次到巴黎，住在羅浮宮附近一間住宅，係朋友當年買落嘅，已經係一九八六年之事。」老總B為之讚嘆：「嘩，近羅浮宮，好正好正，同八六年比，樓價已經升咗十倍八倍。但係既然去過巴黎，唔再去都冇乜大不了，巴黎面貌一百年不變，了無生氣，但我在上海住過三年先至嚟香港，就知道我哋法國點解會俾中國香港追上喇，呢兩個城市面貌年年不同，朝氣勃勃，點似得我哋法國人懷戀過去度日呀。」哦，香港不少自命有文化之人對巴黎、法國讚不絕口，點知呢位法國行政人員就羨慕中國、亞洲有發展機會，唔恨返老家，大抵有錢有地位之人就希望事態維持不變，但年輕人就會覺得乜都唔變，佢哋邊有機會上進，法國年青人唔上街燒車嘅話，嚟亞洲搵機會，與留在法國比較，只有upside！