八方噚日報道，港府個新飛龍標誌熟口熟面，同台灣Vlog網頁嘅設計好鬼似。有讀者話其實唔使捨近取遠，因為中環IFC（國際金融中心）個標誌嗰幾條嘢，同新飛龍標誌代表天空、拼勁同可持續發展嗰幾條綵帶亦差唔多。咁香港成日話定位係做「國際金融中心」，咪啱囉。
有網民就好有聊咁撰文剖析飛龍標誌嘅演變，話個設計同香港社會與時並進，藍、綠綵帶分別代表地產商主導嘅藍籌股同民間強調文化保育嘅聲音，但條藍帶飛得最高，意味始終係地產商左右政府決策；至於勾劃出獅子山脊線嘅紅綵帶伸至飛龍上方，就象徵香港已被內地河蟹化嘅現實。因此，個標誌其實好反映到香港嘅深層次矛盾咁話。