電影《火龍》明明是港式動作片，賣火爆、講暴力、追求官能美學就夠，硬要言之有物。黎明有金句唔講，走去黐鬚封口做警察，金句就留給導演林超賢發揮，任賢齊放棄好男人形象轉行做賊。其實打打殺殺只是糖衣包裝，細意回味原來動作片都可以好有真諦。 撰文：何永寧
每一個人內心都有一場瘟疫，這是導演林超賢新作《火龍》的主題，靈感來自外國一部介紹香港特色大坑舞火龍傳統的紀錄片，林超賢日前接受本報記者專訪時說：「人人都知舞火龍，但點解要舞唔係咁多人知，要睇外國片至知原來係150年前用嚟驅瘟疫，流傳到今日，我就想借呢個寓意拍一部有香港特色嘅電影。」
「條龍俾火燒好慘」
林超賢認為不只是在港取景的電影才有本土特色，舞火龍正好表現地道香港色彩，他說：「啲人見到條龍燒會覺得『嘩！好好睇！』但我反而覺得見到條龍俾人燒好慘、好可憐，亦都係戲裏面兩位主角嘅命運。」肖龍的林超賢自然感同身受，但他找來肖馬的黎明和任賢齊演出，林超賢說：「我喺戲裏面安排佢哋都係龍年出世，但際遇好唔同。任賢齊演一個默默耕耘但冇回報嘅警察，際遇令佢不滿現實爆出心底嘅一場瘟疫。」
林超賢覺得每人內心都有一場疫症，只不過理性跟道德強大時，這場瘟疫才埋藏心底，他說：「好似cancer每個人都有呢個基因，你身體好咪冇事，你抵抗力一差就作怪。心魔都一樣，當外來誘惑、不滿蒙蔽道德時，瘟疫就一發不可收拾，令你行差踏錯。」
市道差嘆生不逢時
曾幾何時，林超賢也受過「瘟疫」之苦，當年隨陳嘉上出道擔任助導，之後機會來臨先後執導《G4特工》、《野獸刑警》、《重裝警察》等電影，不過之後電影市道日漸不景停工兩年，林超賢回想說：「未入行嗰陣個電影市都好好，入咗行冇幾耐個市話唔得就唔得，嗰陣冇嘢做，日日都係返公司度劇本。嗰時諗係咪生不逢時，一做導演個市就咁。」林超賢笑言當時有升上神枱的感覺，因為沒有人會找一個導演去擔任其他職位，他說：「啲人點會要個導演做助製、助導？根本走唔番轉頭。感覺都好灰。」
經過兩年不思進取，幸好內心瘟疫過去，電影市場也開始有轉機，重新投產，林超賢發覺經歷風暴令整個圈的氣氛變好，他說：「今時今日嗰啲至係演員，經歷過低潮知道有幾慘，我發覺家拍戲嘅演員比之前積極好多，更加用心，相對嗰場瘟疫令大家睇多好多嘢，亦成熟咗。」
其實林超賢還有一句金句非常到位：「去當差因為見到啲衰人唔順眼，想拉晒佢，點知當差之後至發覺，最衰嘅喺你上面。」此對白在試片期間引來全場掌聲。相反以出口成文的黎明就金句欠奉，林超賢笑說：「黎明黐咗鬚唔方便講咁多，其實佢嘅角色唔適宜講太多對白。」
小齊自嘲臭寸暴發戶
任賢齊對導演林超賢所講的瘟疫感同身受，當年他在台灣音樂圈求存，眼見同輩歌手一個個上位，自己仍在等待機會的心情記憶猶新，他說：「嗰時見個個上位，自己仲係原地踏步，就會問自己唱歌都好好吖，外形又唔差，點解會咁呢？」
走紅囂張面目可憎
小齊眼見身邊歌手衣着光鮮，自己仍然爛身爛世，自卑感油然而生。直到憑歌曲《心太軟》一曲成名，情形才有轉變，他回想說：「嗰時越唱越受歡迎開始紅，搵嘅錢越多，自己都有啲飄飄然。」但第二場瘟疫就發生，給人抬得越來越高，做事也變得忘形，以為自己凡事都能，人也變得囂張，他說：「嗰時歌繼續唱，但自己就好囂張，不過自己唔會知。」直到一日有位前輩語重心長告誡他，才當頭棒喝，小齊說：「個前輩同我講『你睇吓你個樣同以前唔同晒，越來越囂。』」之後小齊真的去照鏡，才驚覺自己面目可憎，他說：「嗰一刻發現自己已經變到成個暴發戶咁，多得嗰位前輩做咗我嘅火龍，驅走我內心嘅瘟疫。」
對於在《火龍》扮演亦正亦邪的警察，小齊認為是很好的嘗試，他說：「其實之前拍《神槍手》都係做個壞壞哋嘅角色，做演員係要不停咁試，至可以有多啲發揮。」
至於黎明在片中黐鬚上陣，是導演刻意安排，他說：「林超賢想營造一個滄桑嘅感覺，唔想觀眾太留意我嘅樣貌。」但就因為假鬚令他經常不能進食，每次都只能飲流質，但最大投訴還是出自拍攝時間安排，他說：「嗰時明明可以4月開工，唔知點解要等到6、7月至拍，冇得食唔係最大懲罰，天氣熱至係最慘。」
黎明懶理網友嘲笑
黎明拍危險動作也不假手於人，他說：「有一場要拍爬外牆招牌、再由五樓飛落街嘅戲，導演早一日去視察環境，我知佢想我親身落場。我話好睇都唔使睇，費事越睇越驚，總之你做好安全措施就得，又唔係未拍過。」黎明如此緊張，是因為曾經安全不足令他頭上要縫針，他半開玩笑說：「嗰時拍劉偉強套《不死情謎》，我未準備好個道具就爆，即時頭破血流。劉偉強仲問我拍唔拍得，我話流晒血點拍，卒之要去醫院縫針。之後佢再問聽日拍唔拍得，我話聽日唔痛咪拍囉。」表現黎明風趣自我的一面。
《十月圍城》中的黎明一出場，即引來戲院觀眾及網民取笑，他慶幸未有聽聞，他說：「我冇聽過亦冇上網睇過，你話陳可辛一個咁識計數嘅監製，會唔會咁失策計漏呢樣嘢？我就唔信。啲所謂網友，人哋返學返工時佢哋瞓覺，人哋瞓覺時佢上網，佢哋啲嘢邊可信，佢哋都係留番嚟挽救地球算啦！」
故事簡介：車禍命案揭大陰謀
兩個龍年出生的警察黎明、任賢齊，前者嫉惡如仇不依常理出牌，後者冷靜凡事講規矩。身為高級警官的小齊原本前途光明，可惜戀上舞女出身的徐若瑄，令仕途受阻。原以為只要有能力，一樣可以排除萬難更上一層樓，但事與願違，加上投資失利，令小齊內心的瘟疫蔓延，一發不可收拾。
黎明則飽受喪妻之痛煎熬，終日活在過去的陰霾，惟有寄情工作才令他有活着的感覺。他調查一宗車禍命案時，發覺不斷有無形之手從中作梗，背後更牽涉一件重大陰謀。命運將兩條龍連在一起，只有烈火才能將二人從瘟疫中釋放。
《火龍》上映日期：4月1日
