【婚分之謎】38歲的鄭中基（Ronald）和27歲的蔡卓妍（阿Sa），在昨日本報獨家刊登二人結婚證書後隨即召開記者會交代始末，承認已婚同時，更聲稱正辦理離婚手續。據悉阿Sa因難忍Ronald花心主動提出離婚，阿Sa與Ronald分開後隨即搬離淺水灣愛巢，往跑馬地蔚雲閣居住，遠離花心丈夫。
真的假不了，假的真不了。本報昨日獨家刊登了鄭中基和蔡卓妍的絕密結婚證書，證明二人於06年1月在美國洛杉磯已結為合法夫婦。兩位當事人昨日就此事於九龍灣展貿召開臨時記者會，親口承認已婚一事。
昨日下午4時許，Ronald乘坐七人車離開淺水灣麗景花園寓所，直駛往尖沙咀中心金牌大風寫字樓，見Ronald一臉嚴肅，心事重重，問他是否稍後與阿Sa開記招，Ronald遂笑一笑說：「你哋陣間都上九展o架啦？唔講咁多啦！」
分頭工作 如常見Fans
Ronald與阿Sa各自乘車抵達九展，記者會上，二人親口承認已婚一事屬實，不過，Ronald一方面聲稱與阿Sa一起很開心，另方面又指二人因了解而分開，並正在辦理離婚手續，但就從未有交代二人遇上甚麼不快事，只強調不涉及第三者，內容含糊，似有難言之隱。
記者會後，阿Sa與Ronald各自乘七人車離開會場，之後阿Sa直往跑馬地的蔚雲閣。原來，阿Sa與Ronald分開後已遷離男方的麗景花園愛巢，並搬往新居蔚雲閣居住，MaggieQ當年也是在此大廈居住。
另一方面，Ronald離開九展後乘車往尖沙嘴，他的父親、亦即是金牌大風老闆鄭東漢於此處先行下車，原來他也有到記者會會場為愛兒打氣。記者上前問鄭東漢是否到場撐兒子時，他說：「梗係啦。」兒子開記者會交代一切後是否放下心頭大石？鄭東漢說：「唔使我講啦，啱啱佢都講晒嘢。我約咗人食飯呀！」然後急步離開。Ronald則返回淺水灣寓所，準備今日一早飛往成都出席ChannelV頒獎禮。至於阿Sa今日亦將如常出席Twins歌迷會聚會。
不做親家 關係仍密切
記者會舉行前，本報記者先後致電Sa爸和Ronald父親，鄭東漢一聽記者表明身份後即刻掛線，而Sa爸則禮貌地說：「我唔喺香港，我唔知，唔回應。」記者指Sa爸當日有出席見證兩人註冊，他仍撐說：「唔知，你哋搵阿Sa同Ronald啦，我喺廣州呀。」問到有否聯絡阿Sa？Sa爸只回答：「唔知，我喺內地做緊嘢呀。」說畢匆匆收線。
雖然只做了短暫親家，Sa爸與鄭東漢的關係仍千絲萬縷，Sa爸去年簽了一位女新人陳思彤，其後他再將陳思彤簽給金牌大風推出唱片，甚至有傳Sa爸的公司已歸金牌大風旗下，二人緊密合作，無非因為是親家關係。
阿Sa與Ronald雖然未有交代分開原因，但據悉二人分開全因Ronald花心所致，由於阿Sa與Ronald結婚以來，不斷傳出Ronald與其他女性緋聞，阿Sa忍無可忍下遂主動提出分手。至於早前味之天使的春卷王寶寶與Ronald也曾傳緋聞，記者昨日致電春卷，她反應冷淡說：「冇乜留意，人哋鍾意寫乜就寫乜，我同佢都唔係嗰樣嘢。」
採訪：羅德光、朱志聰、胡比
攝影：楊浩賢、李志明、黃偉雄
鄭中基、蔡卓妍記者會全文
鄭中基與蔡卓妍昨於九展舉行記招，兩人一同步出，待記者拍照約兩分鐘後才就座，Ronald拿出預先準備好的講稿，並先發言。
鄭中基：
「好多謝今日大家嚟到參加我鄭中基同蔡卓妍嘅記者招待會。（深深吸氣）結婚，係一個事實（阿Sa望向鄭中基），06年我哋兩個係非常之咁開心，做咗呢個決定，而亦都得到雙方家長嘅支持下，我哋喺洛杉磯註冊結婚。
一路以嚟，我同阿Sa對於我哋嘅感情，同埋結婚嘅態度，我哋都係覺得係我哋兩個私人嘅事，亦都唔需要，亦都冇必要同大家去公開。而我哋雙方面亦都同意呢一個處理嘅方法（阿Sa點頭和應）。咁我知道喺呢幾年內，外界對我哋雙方嘅關係嘅猜測，以及不斷嘅失實報道，令到我哋兩個都覺得，今日係有必要向大家去作出一個交代。而亦都係我哋今次，亦都係最後一次，同大家嘅交代。
喺結婚呢幾年，我哋生活同埋大家都係非常之咁開心，而經過呢一個時間，大家嘅共同成長，同埋對彼此雙方有更加深入嘅了解，發覺我哋分手，係對大家日後係比較好啲嘅。所以，最近我哋同大家宣佈我哋分開，亦都係一個好理性嘅情況下做出一個咁嘅決定，而呢一個決定，亦都係一個事實。
我喺度再強調一次，我哋嘅分開，係冇涉及任何第三者（眼神堅定），亦都冇涉及一啲一切外間所傳，失實嘅報道。我好相信，離婚，亦都係大家跟住落嚟會追問嘅問題，呢件事我哋已經處理緊，而所有一切法律程序要做嘅嘢，我哋亦都會做。
（低頭數秒，托眼鏡）儘管，（強忍淚水，阿Sa則在枱下輕拍Ronald的大髀，然後再遞上紙巾，Ronald拿紙巾輕抹淚水）我哋唔能夠（哽咽）成為夫妻，但我哋的而且確有過一段好開心嘅時間（向阿Sa點頭示意，除眼鏡抹眼淚），更加希望我哋可以成為永遠嘅好朋友。所以我喺度好想多謝大家，同埋好希望大家可以畀些少嘅空間我哋，多謝。（飲泣，抹眼淚）」
阿Sa接着發言：
「其實一直以嚟同……Ronald，由開始拍拖到結婚到即係喺大家分開，其實，大家都係有共識地去做每一樣嘅決定，同埋我哋兩個人嘅選擇，咁我哋結婚係除咗我嘅選擇同決定之外，我哋亦都得到我哋嘅家人同埋有啲朋友嘅支持，咁所以一路以嚟我哋都覺得，呢一樣係我哋兩個人嘅事情，所以冇選擇同大家交代。因為我哋覺得呢一樣係我哋嘅私事，好想呢個係成為我哋一個小小嘅秘密。
（舔一舔嘴唇）咁一路以嚟，其實都以為雖然我哋係藝人，但係都可以有一啲屬於我哋嘅私隱，咁但係原來、原來係（想哭，鄭中基伸手安慰）原來係藝人係唔可以存在有私隱嘅。咁令到今日已經呢一件事唔係淨係牽涉（鄭中基將紙巾遞給阿Sa），唔係淨係牽涉我哋兩個人嘅事（抹鼻），已經係去到一個地步係已經牽涉到好多唔同嘅人同埋事，一路以嚟唔選擇去公開係因為，我哋都達成一個共識，係希望可以保護大家兩個嘅關係，同埋對方，同埋我哋嘅屋企人。
咁到到家，係已經對好多人係造成一個傷害，亦都唔希望會接住落嚟係有接踵而嚟嘅傷害。咁所以今日就同大家一齊去交代呢一件事。（停頓數秒）希望嚟緊大家都可以畀多啲空間我同埋Ronald，咁我哋（兩人互望）都係好朋友（鄭中基點頭），咁希望我同埋Ronald都可以嚟緊生活可以好愉快，多謝。（阿sa抹眼淚，Ronald搭阿Sa膊頭，阿Sa輕聲問Ronald有沒有補充，Ronald輕輕搖頭，兩人離座，向眾人鞠躬。）」
話你知：天真嬌VS失婚Sa
Twins兩位成員先後遇上麻煩事而要開記招交代事件，兩者表現更是差天共地。
阿嬌記者會vs阿Sa記者會
－事件－
阿嬌記者會：為淫照風暴解畫
阿Sa記者會：交代與鄭中基結婚及分手
－時間－
阿嬌記者會：08年2月11日
阿Sa記者會：10年3月27日
－地點－
阿嬌記者會：灣仔英皇娛樂中心
阿Sa記者會：九龍灣展貿中心
－裝束－
阿嬌記者會：穿灰色上衣
阿Sa記者會：灰色長袖衫襯黑色牛仔褲、黑波鞋
－髮型－
阿嬌記者會：順直長髮分中間界
阿Sa記者會：齊蔭長直髮
－態度－
阿嬌記者會：輕鬆保持笑容，更向大家祝福「新年快樂」
阿Sa記者會：態度嚴肅，不停飲泣及拭淚。
資料來源：《蘋果》資料室
英皇唔知阿Sa結婚
蔡卓妍（阿Sa）和鄭中基昨日被本報獨家踢爆06年在美國洛杉磯秘密註冊，二人婚書曝光，有指當時只有雙方家人見證，才讓這段絕密婚姻埋在地下4年。阿Sa為怕影響工作和形象，不惜向所屬經理人公司英皇瞞婚。
阿Sa昨日承認已婚和離婚消息，雖獲經理人霍汶希（Mani）到場力撐，但原來英皇過去一直對阿Sa已婚不知情，Mani昨日在電話訪問證實阿Sa向公司瞞婚：「呢啲係佢私人嘢（指結婚），佢冇通知公司，我哋都係今日睇報紙先知。」
採訪：葉雪
