達成集團（126）喺連雲港打造嘅商業物流項目，係華南城（1668）之後，第二隻金雞蛋，要實。達成連雲港物業項目（72%）已完成土地證辦理手續，面積660萬平方呎，每方呎樓面地價不過17蚊，仲平過一個巨無霸餐。真係係咁意計數，項目每方呎增值/獲利200大元，已經可以為達成總增值/獲利9.5億銀。達成最新市值，不過12.8億銀，項目潛在獲利增值，可以好肥仔。連埋達成其他內房項目重估，NAV上到3.80元，現價1.12元折讓講緊高達70.5%，吸引到痹。
達成2010年半年度純利3.9億銀，又當全年度都係呢個數額入賬，預期PE都係得3倍幾，炒達成業績，亦得。博達成現價翻半番到1.68元，重估後嘅NAV折讓，仍然高達56%，仲有大把收窄空間。
宏安短打博升20%
宏安集團（1222）5合1、再1供3供股集資動作，已經搞掂晒，連供股及派紅股攤薄效應反映，NAV仲有0.57元，現價0.195元折讓，仲高達66%，有唔錯折讓墊底。又宏安經呢期伸手後，集資壓力減輕，斷估都唔會短期內再伸手呱。再講，宏安呢期嘅每股供股價係0.185元，現價唔係執好多。嚟轉短打，博宏安升20%到0.234元，NAV折讓講緊仲有59%。
錢雋