鄭中基（Ronald）和蔡卓妍（Sa）於06年秘密結婚，身為二人老友的梁漢文和周麗淇（Niki）理應知情，不過兩人昨日被問到是否一早知情時，均有默契地顯得相當保密。
身為阿Sa死黨的Niki昨日在電話中說：「係咪一早知已經唔重要，呢個時候我唔適合講任何嘢，我同阿Sa係好朋友，等佢自己講好啲。」可會效法阿Sa秘密結婚？周麗淇笑道：「呢樣嘢自己有所保留，唔會答你會定唔會，免得到時俾人講。」
軒仔贊成分開
梁漢文昨日出席青衣運動場舉行的尹志強悼念活動時說：「我唔係太過清楚，同佢（鄭中基）合作《美女廚房》係知道佢拍拖，其他嘢唔清楚。我都冇收過佢嘅利是。我同Ronald熟啲，但唔會主動問佢嘅私人事，我相信以佢性格唔會太詳細交代感情事，最緊要佢哋生活愉快開心就得，其他嘢我唔敢畀意見。」知否他們會開記者會？他說：「佢哋會開記招？咁我返去睇電視留意新聞。」
張敬軒則說：「同阿Sa係傾夜偈嘅朋友，會講私人嘢，感情事如果佢唔講就唔問佢，都係新聞出咗我先知，佢冇透露過自己結婚。家最後走唔到一齊，可能因了解而分開，佢有私下同我講，做朋友都知，其實佢哋一齊走落去，鄭中基會係好老公，好開心，又有火花，不過人生苦短，唔適合就唔好嘥時間一齊。」
採訪、攝影：馬建華、張俊銘