【婚分之謎】本報昨日獨家公開蔡卓妍（阿Sa）和鄭中基的婚書鐵證，印證了兩人早在06年已註冊結婚，也同時拆穿兩人否認婚事的連串大話。樂基兒和黎明也是經互聯網被揭發於08年結婚，事後大方承認。樂基兒昨日以過來人身份開腔，她對阿Sa和鄭中基已婚一事不感詫異，表示拍拖結婚是平常事，更幫口希望外間尊重兩人不想公開的做法。
蔡卓妍和鄭中基早前被本報揭已婚後，即宣佈分手以遮掩。事實上，藝人的婚姻關係因互聯網被揭破已不是第一次，去年本報經美國內華達州克拉克縣的一個公共搜尋網站，獨家揭露多宗藝人秘婚，包括楊千嬅和丁子高、劉德華和朱麗倩等，眾星在婚姻真相曝光後，處理手法都傾向大方坦承事實。
「都要尊重番佢哋」
樂基兒和黎明被查出早於08年3月9日已在美國賭城Wynn酒店結婚，此後兩人談及另一半時都不用刻意迴避，大方面對夫妻關係。身為過來人，樂基兒昨日在銅鑼灣為IsabelMarant行騷，活動後她對阿Sa和鄭中基已婚一事不感驚訝，她說：「好正常啫，拍拖結婚。不過其實我唔識佢哋兩個。」
對於阿Sa和鄭中基被揭已婚後，忽然宣佈分手，樂基兒說：「呢啲嘢我唔知，係佢哋私人事，我又係第三者，都係佢哋自己答。」那麼事實被公開，不是應該承認嗎？樂基兒說：「都係睇佢哋自己，有時查出嚟嘅嘢，都係佢哋唔想公開嘅，咁都要尊重番佢哋，佢哋想答咪答。」
煮西餐賀結婚周年
黎明之前忘記了兩人的結婚兩周年紀念，樂基兒表示當晚下廚煮西餐和老公慶祝，但沒互送禮物，她說：「唔使，開心一齊就OK。」她又謂會看老公的新片《火龍》，但怕被影到，所以只能買DVD支持。
鄭中基舊愛楊千嬅同樣因為網站而被發現去年8月和丁子高在賭城結婚，事後索性發放照片，計劃今年年底補擺酒的千嬅，更日夜將擺酒喜事放在嘴邊。對於今次前男友鄭中基已婚和婚事曝光，楊千嬅昨日則不作回應。採訪：顏英儀、葉雪
攝影：陳俊強
全城熱話
發哥：可能怕失去Fans
鄭中基和蔡卓妍昨日一同舉行記者會承認兩人已婚，但隨即又表示正辦理離婚手續，事件發展絕對比兩人演出的電影更峯迴路轉，果真人生如戲，難怪圈中人議論紛紛。
周潤發：可能佢哋有苦衷，06年已經結咗婚，可能當時阿Sa如日方中，驚失去fans，希望佢哋有情人終成眷屬。係咪要繼續認分手？如果真係就真的假不了，假的真不了。
陳豪：人哋家事，唔方便參與意見，但自己到時唔知會選擇咩地步，不過我唔會呃大家，只會低調處理，唔會否認，但唔會公開承認。
鄧萃雯：我有睇過呢段新聞，但係唔會認真去睇，自己都係藝人，當然知道有啲嘢係逼不得已，唔係所有嘢都可以攞出嚟共享。
JaniceMan：我冇呀，我好誠實，一定冇結婚，結婚係人生大事，都替佢哋開心，有風水學家話我會遲婚，拍拖係兩個人事，畀啲空間佢哋。
莊思敏：好尷尬，唔知恭喜定唔恭喜佢哋好，知道件事但同時佢哋又宣佈分手，關係好似好複雜。我唔覺件事有宣傳成份，件事對佢哋都好大影響，佢哋承受壓力比普通人多，明白佢哋點解唔公開婚訊。
張繼聰：我同兩位都唔熟，但我太太同阿Sa熟啲，有時會傾吓女人嘢，唔知佢哋婚事，人哋嘅嘢我唔知，最緊要係活得高興。
薛家燕：唔係話分手咩，真的假不了，假的真不了，我真係唔知，係咪有戲上當花邊新聞。能夠成為夫婦係好事，家嘅人都會愛屋及烏。
楊思琦：藝人都需要私隱，人哋嘅事唔會畀意見，或者佢哋有自己嘅理由而咁樣做，每個人都有自由決定自己嘅終身大事。
Kelly、克勤勇於分享
很多藝人都會以保護私隱為由將感情事低調處理，蔡卓妍和鄭中基之前也選擇隱瞞婚事。不過娛樂圈中，也有不少藝人願意將人生大事的喜悅跟大家分享，當中包括陳慧琳、李克勤、謝安琪和梁漢文。
梁漢文 08年12月18日
梁漢文（Edmond）與拍拖10年的模特兒女友林文慧（Karen）拉埋天窗，在金鐘香格里拉筵開36圍。Edmond當日表現緊張，宣誓時差點搶讀太太的誓詞，更揚言希望太太婚後永遠開心。
陳慧琳 08年10月2日
樂壇天后陳慧琳（Kelly）和拍拖16年的男友劉建浩（Alex）在洲際酒店舉行婚禮。09年7月，Kelly誕下兒子劉昇，她更不時在活動上分享婚後及為人母的喜悅，更曾笑指「囝囝啲屎都係香。」
謝安琪、張繼聰 07年1月20日
當時懷有5個月身孕的謝安琪與拍拖兩年的張繼聰在機場富豪酒店行禮，張繼聰對太太的愛的宣言是：「我承諾會花下半世實現。」同年6月兩人的愛情結晶張瞻出世。
李克勤、盧淑儀 06年11月28日
拍拖14年的李克勤和盧淑儀結束愛情長跑，在洲際酒店舉行婚禮，克勤在婚禮上更獻唱《你是我的太陽》表愛意，令太太喜極而泣對老公說：「嫁畀你係我嘅驕傲。」
一網講盡：網友直斥講大話
阿Sa和鄭中基被本報揭發已婚後，有歌迷在討論區留言，對偶像說謊感失望，但也有人表示支持。
nevergiveup：成日講大話，點同小朋友交代？
SMOKEEYE：有劉華做例子，佢哋都唔知驚，大話一個蓋一個。
JE82：係結過婚又點？結婚同分手兩件事唔可以都係事實咩？
樂基亞：究竟係分手大龍鳳博宣傳定係離埋婚？
橙橙2號：如果我鍾意呢個歌手，唔會因為佢結婚而唔鍾意，但就會因為佢講大話而對佢反感。
angel04：始終坦白係最好，我都係會支持佢。
資料來源：香港討論區、高登討論區