中國愛滋病防治行動前晚喺君悅酒店搞Ball籌款，發明愛滋病雞尾酒療法嘅何大一教授同埋行政會議成員梁智鴻做聯席主席，呢個Ball主題係扮嘢，大會搞咗個「瘋狂智扮金刀梁」嘅大賽，邀請來賓扮得鬥似梁智鴻醫生。
潘朵拉星人現身
食衞局局長周一嶽原來好玩得，戴上金刀梁招牌粗框眼鏡，梳中間分界頭，可惜身形有別，假的真不了；九巴後人雷禮權係扮嘢高手，自備假髮、假削牙同粗框眼鏡，變成Q版梁智鴻，梁智鴻都讚佢維妙維肖，雷禮權更反指「梁智鴻扮雷禮權」。
不過，點都唔及雷禮權老婆利蘊珍厲害，全身變藍駁髮扮阿凡達潘朵拉星人，佢話化妝都花咗3個鐘頭，驚嚇親阿媽利孝和夫人。
其他來賓人人整古做怪，「眾人媽打」李麗娟扮鄧碧雲，佢妹妹李桂蘭就扮性感女警，莎莎老闆郭少明一家就變成飛機師、空中小姐。