港大史上首個被公投罷免嘅學生會會長陳一諤（圖），潛藏一年近日再蒲頭，前日報名參加學生會補選，今次唔係選會長，而係財務秘書。
諤少話前日先決定參選，由於學生會被指賬目混亂，所以希望做呢個位睇實盤數，佢不評估勝算，話要視乎自己可以花幾多時間競選，「本身呢個學期讀好多credit，參加好多義務工作。」佢早前接受中大《大學線》訪問，話被公投拉下馬後厭倦政治，又指學生會好政治化，八方以為佢睇化收山，估唔到想東山再起。
有紅色背景
除諤少外，今次仲係好幾個人嘅復仇之戰，舊年輸俾陳一諤嘅盧重匡，報名出選會長，對手係盛傳同諤少友好嘅沈顯龍，佢係之前未能通過信任投票嘅尚風閣外務副會長候選人，盧重匡當陳一諤係「自己人」，人哋卻未必咁睇。
今次捲土重來嘅仲有尚風閣成員梅懌熙，佢之前參選會長同樣未能通過信任投票，呢次翻兜選內務副會長。港大校內盛傳沈、梅二人同左派人士過從甚密，有參選人具紅色背景，港大學生會赤的疑惑揮之不去。