腳痛落台啱啱5年嘅前任特首董建華，噚日突然現身寶島。據台灣中央社報道，老董同太太趙洪娉噚日上晝約11點抵達高雄，去咗家族生意東方海外嘅貨櫃碼頭逗留一陣，然後去當地嘅奇美博物館參觀兩個鐘。當年一手推出西九文化區嘅老董，大讚館藏豐富，話參觀完覺得自己對藝術嘅認識都升呢。
被疑有特別任務
老董貴為全國政協副主席，老竇董浩雲當年又同國民黨關係密切，台灣《聯合報》話佢此行會同國民黨榮譽主席連戰會面，令人思疑赴台係唔係有特別任務。老董發聲明話已經十幾年冇去過台灣，此行純粹私人探親觀光，會逗留一個星期，順便見吓親家、高雄大學前校長王仁宏。王仁宏個外甥女醫生，原來早幾年嫁咗去董家，家喺香港執業。