上次介紹去韓國睇櫻花，同事阿貴話嘥錢，「長洲都有啦。」問過長洲區議員李桂珍，佢話關公忠義亭前嘅台灣種櫻花，農曆年已經開咗，明年請早。
其實，香港仲有個地方睇到，尖沙嘴海港城3月31日至4月11日，會引入幾棵唔同顏色嘅日本品種櫻花，喺亞熱帶地方，都可以感受到北國之春。
稍後移植男拔萃
呢批日本櫻仲可能入籍香港，因為男拔萃校董張宇人講，海港城初步話將櫻花樹展出後俾男拔，男拔想種喺中小學部校園，開花時仲會開放俾市民參觀，大家就可以去加多利山（男拔所在地）賞櫻，幾有詩意！（不過，香港同日本天氣咁大分別，種唔種到都未知。）
日本人鍾意櫻花樹下品嚐櫻花食品，海港城嘅ROYCE'就推出改良嘅Kirsch櫻桃白蘭地巧克力、GODIVA有三種櫻桃味巧克力、Leonidas嘅櫻桃啫喱糖。餐廳包括nijibistro、和花亭壽司、鈴木珈琲館，香味屋仲會有櫻花餐㖭。
最搞嘢係，商場地下女洗手間變成櫻花洗手間，會點燃櫻花香薰，安排着和服嘅「櫻花大使」送上櫻花香水及櫻花香味護膚品。
海港城仲會展出日本80年老店「今井達摩店」製造嘅達磨翁。達磨翁係日本人祈願吉祥物，兩隻眼睛係空白嘅，許願後喺左眼點上眼珠，一年內願望成真，就點埋隻右眼，再攞去寺廟化咗佢。
不過阿貴話，麥理浩徑近馬鞍山段，呢排杜鵑花盛放，行山友湧去影靚相：「一毫子都唔使。」（向達磨翁許願，唔好俾我遇到咁孤寒嘅老公。）
電郵：mailto:[email protected]