港府微調、優化面世九年嘅飛龍標誌，喺龍尾加上三條綵帶，中間一條勾勒獅子山形象，象徵香港人堅毅獅子山下精神，飛龍則被縮細放埋一邊，以獅代龍意圖十分明確。唔將條龍一筆勾銷，好明顯係因為飛龍乃係煲呔baby，鬍鬚曾身為煲呔好兄弟，梗係唔會咁大逆不道飛起條龍。
「係台灣網站」
港府今次花140萬元請名師為飛龍續尾，是好是醜，係好主觀嘅品味問題，八方唔係設計專家，所以絕對唔敢置喙，之但係八方有個同事心水清，一睇設計大師陳幼堅嘔心瀝血個新設計，即刻衝口而出：「乜咁熟面口嘅。」
正當八方仍在欣賞掛綵飛龍之際，呢個見識廣博嘅同事已上網搵咗台灣網站Vlog嘅網頁俾八方睇，八方一睇，第一眼以為佢玩嘢，「做乜叫我睇香港政府介紹飛龍個網站？」未等我講完，佢已經糾正我，「呢個係台灣網站。」咦！係喎，確係台灣短片網站Vlog頁面，乜得網頁個logo設計，同飛龍條新尾巴咁神似嘅呢？
有幾似？大家睇過就知。八方覺得最抵死係兩個設計連用色都不謀而合，天下文章一大抄八方見得多，估唔到呢個世界，原來真係有咁巧合嘅事！已屆化境嘅神級設計師，可能喺創作時靈感會互通都未定，否則，八方都不知如何解釋新飛龍同Vlog個網頁logo形神俱似呢一件事。
創意有盡時，好嘅設計，喺全球一體化天下為一家嘅大同年代，互相參考、觀摩、模仿，唔一定係抄襲、剽竊，可以係取長補短文化交流嘅正能量，只需要140萬元，港、台兩地就進行咗一次深度設計意念嘅啟發，比起官府浪費嘅無數寃枉錢，八方衷心覺得物有所值，財爺鬍鬚曾讀建築出身，好尊重創意，應該冇理由覺得俾人斬到一頸血。
飛龍旺煲呔
01年煲呔推出飛龍標誌時，俾人笑條龍似濕水地拖頭，又有人話似街頭塗鴉，有玄學家更指飛龍似一團火不利香港，事實證明飛龍旺煲呔，鬍鬚曾龍尾掛綵，遲早旺到七彩。
mailto:[email protected]