大眼開雙　變不羈日系型男

大眼開雙　變不羈日系型男

一提到份量十足巡航大綿羊，大多諗起身材魁梧嘅美國伯伯騎住四出招搖嘅畫面。不過睇見HONDA2010新版SilverWing600GT，單眼變雙眼嘅車頭、瀟灑流暢嘅車側線條，令腦海頓時換畫，大羊主人突然變成等住陪你遊車河嘅日系不羈型男。

記者：許維雅
攝影：譚盈傑
Model：Sukmi

霸氣＋瀟灑

隨年齡改變，大部份愛電單車嘅成熟男、優皮一族都會首選巡航大羊，HONDA嘅重型代表有SilverWing。呢隻巡航綿羊自01年後一直無轉過款，最近終換上新面貌，更有400及600兩款型號以供選擇，代理引入嘅600屬較豪華版本。全新SilverWing600GT嘅最搶眼位莫過於車頭單眼變雙眼，一對大眼仔配合尖長車頭，感覺猶如幪面超人座騎，可愛造型出奇地為一向穩重嘅巡羊添上一份年輕感。

從車側睇，變得更Trendy，流暢嘅線條配合龐大車身，保持一貫SilverWing男性霸氣之餘，又多了份瀟灑魅力。流線設計於實用性上亦起了低風阻作用，減低亂流及較低風噪嘅效果令巡航時倍覺享受。而600比起400更搶眼嘅地方，除把手末端採電鍍設計，尾後車章亦用上更型嘅金色。今次代理只引入ABS版，一來更安全，二來金色頭尾制動卡鉗亦係另一搶眼位。

■600GT版獨有嘅SilverWing金色車章，充滿型格味道。

■誇張尾燈配尖線條車尾組合，感覺Trendy。

■ABS版嘅頭尾制動卡鉗特別用上金色，更型。

慳油高達9%

雖然新一代SilverWing引擎規格無變，但雙凸輪軸嘅輪廓經過悉心調校後，令引擎高轉行車時嘅表現更有活力，間接令馬力增長方面輕微升了一匹。其實愛SilverWing嘅車迷都唔會太着眼馬力嘅一兩匹增長，行車舒適暢順嘅表現應該先係佢哋關注嘅大前提，雙缸大綿羊嘅中置引擎令重心更歸一，尾避震所承受嘅壓力減低，已成功帶來舒適穩定嘅第一步。加上高拉力鋼管搖籃式車架亦大大減低行車時嘅震盪，巡航時所需要嘅寧靜、優皮意境，SilverWing一定可以畀到你。

■座椅下有一個55公升容量嘅儲物箱，足夠收藏兩個頭盔。

■單眼變雙眼嘅車頭造型好有幪面超人座騎嘅味道。

耗油方面，雙重催化裝置嘅排氣喉、PGM-FI電子供油程式等配備，都有助監控燃油效率達至最佳油耗嘅表現，比起上一代慳高達9%嘅汽油，平均約$0.6一公里。更配備T-Mode模式，當轉數高達500轉左右時，油門反應會更敏捷，即類似私家車嘅Sportmode，最啱上斜、爬頭及行山時啟動，保證任何環境下都有駕駛樂趣。

■車頭兩邊嘅風口位好似一對小翼，為車頭帶來更多動感。

■死氣喉表面鋪上電鍍板添豪華感。

規格

SilverWing600

引擎：四衝水冷DOHC雙汽缸
馬力：50ps/7,500rpm
扭力：5.6kg-m/5,500rpm
傳動：V-Matic無段自動變速，皮帶
售價：$88,800

■車身顏色有黑、白、銀灰三種，而銀灰色只屬600專用。