周五19/03
波膽長路有盡時
回氣日不投注，貼波膽勁勢由海倫芬最後1分鐘贏夠4:1「爆膽」失手終止。
閒贏指數：★
周六20/03
做足功課交到貨
上半段睇日聯澳職悶到爆，場場和；中段過到維拉嘅單W又斷，忍到深夜12點後好彩法比仔喺兵工廠踢少個仲入到2:0，幫到波友；又好彩全日推介川迪[+1]中到，小勝無損旺氣。上次睇過燕豪芬點被阿積士大炒，呢場做足功課交到貨。
閒贏指數：★★
周日21/03
追捧鯨魚大豐收
跑日馬，點都要支持些少，但冇得睇嘅小弟日聯季初重點推介名古屋鯨魚，我更着緊，貼到[-1]博2.7倍，開波1分鐘已1:0領先山葉，但等到完場前至入到第2球，有運但豐收。
閒贏指數：★★★★
周一22/03
列斯聯謝緊勿亂投
冇波睇，收工返屋企囉囉攣都要買番多少，但相信大家多中伏，鋼膽洛辛堡單W也斷，英甲列斯聯自從谷到行喺英足盃贏過曼聯後，好似謝咗；今晚主場又輸畀米禾爾，唔多對路喎，未復蘇前勿胡亂博反底，勿以主觀願望以為佢哋升硬班，揸死數據賭波，不智！
閒贏指數：★
周二23/03
有西維爾教頭陪葬
以往好鍾意研究英冠賽事，但唔知係咪家直播波太多，狂迷如我也兼顧不下，更遑論同英超撞時間嘅英冠。貼中米堡贏兩粒加紐記作客贏波，但其實自己都冇下注；反而直播嘅韋斯咸以為上次對阿仙奴打得唔差，返主場對狼隊冇走雞啩，結果買熱W同西維爾齊斷，不過有西維爾教頭「陪葬」，蘇拿就……
閒贏指數：★
周三24/03
講波佬硬銷最核突
單係凌晨3點打後，大家數唔數到有幾多場直播波？答案係13場。英意西德，各有所好，但聽到「現在台」位講波佬硬銷西甲最強，講到自己嗰台有影響力令西甲嘅播放時間就到亞洲觀眾，真係有啲核突。睇到巴塞對住奧沙辛拿全場大部份時間老鼠拉龜，睇到球王美斯下周歐聯大戰前，有狂譟症迹象；但係好眼瞓，睇唔到文仙尼㷫到同莫耶斯講手，輸波輸品，最差！
閒贏指數：★★★★
周四25/03
荷蘭波密食當三番
荷甲好賭，荷盃何嘗唔係？上日中飛燕諾，今天熱食阿積士，攞番啲彈藥先！
閒贏指數：★★★
值得跟進球隊：樸茨茅夫、伯明翰、富咸
（踢聯賽已漫無目的）