噚日去咗SOHO同幾個朋友飲咖啡，因為RubySeven，成條街都係外國人，差啲連位都冇。大家傾開，原來都係公平貿易咖啡擁躉，朋友Grace喺樂施會做，話今日係國際公平貿易雙周揭幕，樂施會有研討會研究呢種貿易喺香港嘅發展。佢話，可惜唔係太多人理解公平貿易，或者以為公平貿易嘅咖啡，味道會差啲。
當然唔係啦。英國Cafedirect嘅公平貿易咖啡，早前都攞咗等同飲食界奧斯卡嘅GreatTasteAwards。Cafedirect喺本地超市都買到，三款好暢銷，包括中度、高度烘焙咖啡，用阿拉伯咖啡豆烘焙，好香滑。另一款Espresso，冲出嚟面層會有「黃金泡沫」，就係所謂的crema。每包淨重227g賣$49。
農戶唔使俾中間人剝削
小妹飲咗兩年幾，早前仲同Cafedirect行政總裁AnneMacCaig傾過，佢話係同全球14個發展中國家嘅註冊公平貿易農民組織，直接貿易，又將50%利潤資助農民組織。佢仲話，部份公平貿易機構會用指定最低價買咖啡豆，但佢哋堅持用市場價或高於市價，因為農戶得到合理收益，先可以確保佢哋生產出上乘嘅咖啡豆。
公平貿易確能保障生產者收回成本，唔俾中間人剝削，值得支持。"Youarewhatyoueat"，如果飲落肚嘅，係人哋被剝削後嘅苦澀，我哋又會變成乜嘢人呢?
電郵：mailto:[email protected]