【高級組銀牌籃球總決賽】剛於負方決賽成功「復活」的永倫，昨晚在灣仔修頓室內場上演的銀牌籃球總決賽，憑狀態大勇的隊長潘志豪於攻入全場最高的25分，帶領球隊以78:65擊倒對手，成功阻止南華完成「3連霸」，雙方將於下周二於同地決一死戰。記者：鄧永賢、吳淑珊
由南華及永倫兩支本地籃壇班霸合演的總決賽，昨晚吸引近2,000名觀眾入場打氣，逼爆灣仔修頓室內場。衞冕的南華有隊長譚偉洋及新兵周健宏「雙塔」陣，配合射手羅意庭、劉子健及李劍煌於外線進攻。
「阿豪是大賽球員」
「黃衣軍團」永倫今仗有主力香振強左腳因傷倦勤，但上次因「5犯」離場致球隊輸波的隊長潘志豪就打到「着火」。就連南華領隊洪游奕賽後也讚不絕口︰「阿豪是大賽球員，己隊球員今仗『嘜』不到他就是輸波關鍵。」
永倫今仗由方誠義的入球揭開「復仇」序幕，雖然潘志豪及呂楚威於首節兩度誤傳，令雙方拉成均勢，但南華多名球員及後受犯規纏身，被永倫的周迎堅及潘志豪多番入楔及外圍得手，助球隊半場領先37:34。
下周二晚生死決戰
易邊後，力爭「3連霸」南華憑隊長譚偉洋及吳家麒在內線強攻，雖3度與對手打成平手，但在永倫「粉絲」落力打氣下，第3節仍續以5分落後。永倫之後憑潘志豪於第4節初段接連射入他全場5球3分中的其中3個，再次拉開比數。
最終潘志豪交出全場最高的25分，帶領永倫以13分大炒對手。由於賽事為雙淘汰制，本賽未嘗一敗的南華可「復活」，雙方將在下周二晚真正決一死戰。
永倫領隊林植昌賽後表示，今仗勝在全隊夠團結︰「賽前提醒隊員在香振強缺陣下要多走一步，最終他們做到團結一致；加上阿豪第4節初段連入幾球3分波，為全場的轉捩點，望下周二能發揮今仗水準，再次打場好波奪標回饋球迷。」本報訊
《花絮》
「L囗」擺上身有意義
南華噚日件波衫有新意思，喺右上角多咗個「L囗」嘅logo（圖）。原來係南華早前到台灣集訓，得悉台啤副領隊「黑人」陳建州同未婚妻范瑋琪發起一個「LoveLife」嘅公益活動，以「L囗」代表支持罹患癌症末期嘅兒童。咁有意義，南華梗係「擺上身」啦。
5點賣飛球迷狂插
噚日場男子組銀牌決賽雖然8點半先開波，但波飛提早喺5點開售（圖），唔夠一個鐘就火速賣晒。5點半喺金鐘放工趕嚟排隊買飛嘅梁先生，排咗45分鐘，啱啱買唔到最後一張飛。佢就好不滿咁話︰「5點賣飛根本就無諗過打工仔嘅放工時間，想多啲人睇又唔喺大啲嘅新伊館搞，真係好不滿。」
「紅黃軍」鬥送禮
噚日場「紅黃大戰」，除咗兩球員喺場內鬥到你死我活，場外打氣團為咗吸引fans，亦各師各法。「紅軍」南華賽前就學足NBA咁，由球員掟tee畀球迷，務求以「紅海」造勢；而「黃衫兵團」永倫亦唔輸蝕，搵人預備咗成千張poster喺場館兩邊入口派畀球迷（圖）。
福建卓婷攞32分搶鏡
至於噚晚打頭陣嘅女子高級組銀牌決賽，喺負方決賽「復活」嘅福建大打爭氣波，射手卓婷（藍衫）個人轟入咗全場最高嘅32分，半場已領先對手中銀香港10分，最終更以86:49大炒對手，令雙方要喺下禮拜二晚重賽再分高下。
