英治時退休高官起身就坐郵輪返老家，特區嘅高官退休就大把世界，任總固之然唔憂，只怕佢嫌太辛苦啫，一般高官退休後亦出路廣闊，曾任衞生福利局副局長、食環署署長嘅梁永立，噚日獲委任為人類生殖科技管理局主席，任期兩年，下月11號起生效，做主席九年嘅梁智鴻離任。呢個局監管人工授孕、試管嬰兒事宜。梁永立家係煲呔御用智囊智經研究中心秘書長。
此外，有「鐵的衙門，流水的官」金句嘅前朝高官施祖祥，離開官場後做貿發局總裁，04年退休，最近泊上陳永棋家族碼頭，陳家兩間上市公司長江製衣、YGM貿易噚日同時宣佈委任施公做非執董，每年袍金共20萬元。