靚女模特兒MandyLieu、JessicaC.、諸葛梓岐、汪圓圓同貝安琪，前晚喺又一城齊齊行騷。行騷經驗最豐富嘅MandyLieu打頭陣出場，佢着上豹紋花裙襯矮踭長靴行騷，點知行到台正中就跣腳，成個人跪喺地下，佢即刻爬番起身，之後換衫再出場，全程尷尬喪笑。
MandyLieu事後話：「對boots個底好滑，膝頭好痛、紅咗，好彩冇整親塊面，呢啲係意外，幾多年騷嘅經驗都避免唔到。」問佢係咪失戀失魂？佢話：「唔關事，個地跣啫，不過我冇男友，要一個人返屋企捽藥酒。」
JessicaC.晒半邊胸
JessicaC.示範白色連身裙，露出單邊警鐘胸，佢話怕走光同跣落地，佢話：「Mandy喺後台有叫我小心，如果跣低嘅係我，我一定大喊一場。今日都擔心走光，因為要換好多套衫，我都試過走光，俾大家影到紅色內褲。」今次只露一邊警鐘胸，JessicaC.笑住話：「小休呀！」佢仲話男友終於返香港，佢希望完騷後火速返屋企見男友，仲話想復活節假期拍拖去沙灘玩。