復活節長假期未到，政府先派復活蛋畀高官happy過節，噚日公佈多個高官升職消息，不過最矚目嘅調動，卻不在噚日升官榜上，而係財經事務及庫務局副秘書長甯漢豪，舊年佢喺立法會怒斥長毛不應該講粗口，喺官場名噪一時，煲呔都對呢位女AO刮目相看，欽點佢入禮賓府做私人秘書。
做特首私人秘書
政府噚日宣佈現任特首私人秘書麥靖宇下月出任特首辦常秘，冇同時宣佈私人秘書繼任人，係因為甯漢豪要待今年度預算案通過後先可去特首辦返工。甯漢豪89年加入政府，曾喺新機場工程統籌署、公務員事務局、教育局工作，最經典係舊年3月出席立法會時反駁長毛爆粗，事後獲煲呔點名稱讚。
當日長毛勁講仆街、臭四痛罵高官，連卿姐都㩒佢唔住，甯漢豪卻直指長毛不應講粗口，話身為家長，係唔會教仔女講呢啲說話。當一眾司、局長面對長毛、毓民爆粗都做晒鵪鶉之際，甯漢豪表現令人意外，左報評論更大讚佢係「女英雄」、「反應快」、「夠吉士」，事隔一年佢果然上位，日後煲呔再被長毛等人狂鬧時，有個女將傍住，應該無咁驚。
有多個高官升職
甯漢豪上位，財經事務及庫務局副秘書長個位由食環署副署長劉焱接任，劉焱曾擔任煲呔政務助理，被視為官場明日之星。其他升職高官有電訊管理局總監黎陳芷娟，下月會做食物及衞生局常任秘書長，接替退休嘅孔郭惠清；現任勞工及福利局副秘書長（福利）利敏貞，5月3號會出任電訊管理局總監。
現任商務及經濟發展局常任秘書長（通訊及科技）栢志高，5月會出任運輸及房屋局常任秘書長（房屋）和房屋署署長，接替退休嘅陳鎮源。栢志高起身，個位由現任行政長官辦公室常任秘書長謝曼怡頂上，4月正式上任。掌管政府化驗所嘅丁大倫博士夠鐘退休，由助理政府化驗師劉秋銘頂上，下個月起升做所長。
mailto:[email protected]