金管局前總裁任志剛退休後全力學hea，佢話唔容易，噚日喺自己個blog透露，今個月底「過冷河」期屆滿，樂於做非執行或顧問性質工作，睇嚟任總重出江湖日子不遠。
任總話hea感覺蠻好，以前每朝都要喺國金「志剛講場」見記者，家陣陪太太食完早餐就揸車去打高球，順便睇報紙，完成「例行公事」先返屋企開電腦睇e-mail。過咗一段日子退休生活，任總稱已搵到hea同工作之間平衡，最好係各佔一半，因為hea得多，個腦會生銹咁話。
想做非執行或顧問工作
做中國金融學會執行副會長同中大全球經濟及金融研究所工作，任總話已夠佢忙，已花佢七七八八時間，所以要婉拒好多其他工作邀請，最好可以做非執行或顧問工作，發揮自己喺風險管理同管治上專長，總之千萬唔好影響佢繼續hea嘅計劃。
好多人估計任總未來動向有眉目，幫大地產商辦事似乎唔係佢口味，做半官方機構太屈就，要做梗係做國際性大機構先啱佢身份啦。