過咗農曆新年好似冇耐，復活節學生假期又殺到。我用個「殺」字，係因每當子女放長假，做人阿爸阿媽嘅就必為安排子女活動而頭痕，相當攞命。好似小弟下星期就要陪囡囡去離島，畀百幾蚊參加沙灘掘復活蛋嘅活動，對我呢個中坑嚟講，久違嘅童真一鋪返晒嚟。
作為實際主義者，我曾諗過自己塞啲雞蛋落沙灘畀個女掘餐飽，既唔使同人逼，連舊幾水都慳番。但諗同做係兩回事，點忍心咁樣對個女？每個小朋友都應該要過快樂復活節，所以念頭一瞬即逝。
我唔知喺單親家庭長大嘅卡斯辛奴，童年過復活節開唔開心，但近期就應該唔多開心，事關國家隊教練納比擺明唔會送張去南非嘅機票畀佢。我堅信佢好波，亦信佢明日可領軍贏卡利亞里。
文：藍鑽石
主客和：森多利亞勝
心得：一個卡斯辛奴夠殺
近5場往績：LWWWW