今時今日的藝人，唱歌、拍戲又做生意，忙到分身不暇。入行8年的麥浚龍（Juno）便是其一。近年Juno與鍾欣桐（阿嬌）傳緋聞外，變成了絕緣體，自己也數不清幾多年沒有拍拖。Juno更表示如果拍拖，想找結婚對象生兒育女。
麥浚龍最近為動畫電影《馴龍記》配音外，去年拍了電影《維多利亞壹號》及《剖術者》，也要為唱歌及時裝事業奔波，一天二十四小時不夠用，更何況識女仔，他日前說：「我都數唔清dry咗幾多年，拍拖講緣份，如果拍拖，我都想搵嘅係結婚對象，做個後生爸爸。」
Juno坦言另一半最好比較簡單，他說：「我想私生活簡單啲，但都要遇到先知，做我女朋友最緊要識幫我打呔，因為我唔識，我覺得好浪漫，好識照顧我。」
Juno在好友阿嬌遇上淫照風波時，多次出言力撐，有好劇本會否預阿嬌一份？他說：「唔到我決定，我同邊個合作都冇所謂。」
預祝阿嬌成功
話題一轉，問到與傳不和的陳冠希拍戲會否介意？他卻說：「都係睇劇本，但喺我嘅工作暫時未見可能性。」對於漸漸復出的阿嬌開演唱會又拍戲，Juno說：「當然開心，支持佢出嚟，我祝佢一定成功，作為朋友都係開心事。」
Juno透露為《馴》片配音時，剛巧撞正為三級電影《剖術者》開工，令他憶起當時的痛苦，他說：「兩部戲好大對比，壓力大到不停打嗝七個鐘，最後要睇精神科。到拍《剖》片結尾，又唔小心俾斧頭扑到隻耳仔，耳骨腫到谷血，因為配音要戴耳機，即刻搵醫生上嚟幫我做個小手術放血。」
唔收錢做監製
Juno一口氣拍了兩齣三級片《維多利亞壹號》及《剖術者》，兩片同是好友何超儀投資的作品，就像升級為三級演員，Juno卻說：「呢兩部都唔係色情嗰種，《剖》片仲係我原創故事，初初超儀叫我做埋監製，唔收錢都想試吓，我仲叫佢象徵式畀一蚊就得，但我未得住，所以只做其中一個監製。」
採訪、攝影：溫敏芝
場地提供：CafeZense
