國際油價去年回落三成幾，中國石油（857）盈利只跌一成已算唔錯，同樣係賺過千億元（人民幣．下同）嘅工商銀行（1398），雖然盈利亦增16%，但喺中央嘅經濟調控手段下，國企靠本業賺錢越嚟越難，難怪紛紛要搞其他生意。
內地存款息口唔似香港近乎零，喺銀監指導信貸投放下，存款基礎大嘅銀行如果唔將錢借出去會好蝕，但借得太多，阿爺又唔高興要發懲罰性票據、加存款準備金率封殺，加上息差收窄，銀行只好力谷非利息收入去谷數。工行單係呢方面嘅收入，去年就大升34%，佔營業比重超過兩成。
同樣嘅困境發生喺中石油身上，如果唔係煉油業務轉盈賺173億元，純利會跌近三成，同國際油價跌幅睇齊。喺國家價格管制下，內地成品油價未能跟國際接軌，過去油價高企時，中石油慘，中石化（386）更慘，煉一桶、蝕一桶。
中石油成本控制做得唔錯，油價大跌整體毛利率只跌0.2個百分點，天然氣更微升。可是即使營運有改善，但稅制拖累，結果事倍功半。
中石油淪為公用股
過往為咗喺石油巨企身上Good水，油價高企時要向中央交特別收益金，股東見到都好「肉赤」。去年嘅喜訊係呢筆支出由853億元大減至200億元，以為飲得杯落，點知新實施嘅燃油消費稅，本身交開135億元嘅中石油，突然要交824億元，仲有林林總總好似城建稅同教育費加埋53.7億元。結果到頭來錢係賺少咗，稅款卻交多9%。
國企、央企面對嘅挑戰係產能見頂、增長放緩，但又要配合國家每年10%高經濟增長，通脹低於3%嘅整體規劃。行業雖為壟斷，卻享受唔到主動定價嘅優勢，供求自然失衡，經濟效益梗係偏低。中石油已淪為公用股嘅現金牛，要追尋昔日高增長故事，睇怕要向佢下一代，轉型做低碳天然氣嘅中油香港（135）發掘。
董事長蔣潔敏話中石油LOGO係一半石油一半天然氣，加埋係一個太陽，希望唔係一片夕陽。
胡孟青